Reportajen Joselina dos Santos
Loron aniversáriu dahuluk ba Autoridade Protesaun Sivil (APC), Ministru Interior (MI), Francisco da Costa Guterres husu ba funsiunáriu sira atu serbisu ho fuan hodi serbi povu no estadu nomos tane-aas povu hodi proteje no elemina povu husi akontesimentu dezastre naturais iha Timor-Leste. Nune’e mos Sekretáriu Estadu Protesaun Sivíl husu atu sura mos povu Timor-Leste hamutuk ho autoridade no lider komunitáriu no parseiru sira atu kopera ho Autoridade Protesaun Sivel hodi kombate dezastre naturais iha Timor-Leste.
Iha diskursu, Ministru Interior, Francisco da Costa Guterres hatete, ohin revolusaun ida ba Timor-Leste tanba Protesaun Sivil hahú nia servisu bombeirus hodi serbi estadu ida ne’e bainhira mosu akontesimentu inundasaun, rai monu no rai halai.
“Imi tenke haree ba lema APC nian hodi proteje no servisu hodi serbi ba povu, hatudu imi nia vontade no tau interese estadu no tane-aas povu du ke imi nia interese rasik. Tanba iha situasaun difisil imi haluha imi nia família hodi ba salva komunidade sira ne’ebé hetan dezastre no ema ne’ebé presiza imi nia tulun,” dehan Ministru Francisco iha nia diskursu ba loron aniversariu APC, iha edifisiu APC, Kaikoli, 28/07.
Governante ne’e hatutan, Autoridade Protesaun Sivil iha papel ne’ebé importante tebes, tanba ne’e husu ba sira tau interese estadu ba oin no serbi estadu ida ne’e hodi kumpri estadu nia misaun. Sira tenke hatudu katak sira ema ne’ebé eskollidu atu serbi povu.
Iha fatin hanesan, Sekretáriu Estadu Protesaun Sivil (SEPS), Domingos Mariano Reis agradese ba Autoridade Komunitáriu sira ne’ebé hola parte iha asisténsia sosiál hodi apoiu APC iha tinan rua kotuk, inundasaun boot ne’ebé afeta ba komunidade iha loron 4 fulan abril 2021, ne’e sai referénsia hodi hafanun Timor-oan hotu hodi modifika forsa hodi hateke ba oin, mai hamutuk hodi kombate no elemina dezatre iha rai laran.
“Hanesan governante ne’ebé tutela ba Autoridade Protesaun Sivil hato’o solidariedade ba dezastre ne’ebé mosu iha pasadu hodi afeta ba povu Timor-Leste. Autorudade Protesaun Sivil prontu 24 oras atu proteje no atende populasaun hotu ne’ebé afeta ba kauza dezastre”, dehan SEPS, Domingos Mariano Reis.
Nia dehan, APC prontu atu serbi povu, nune’e husu sira nia apoiu tanba sira mesak sei labele, ne’e duni tenke sura mos povu Timor-Leste hamutuk ho Autoridade sira nomos lider komunitáriu, parseiru nasional no internasional hodi kombate dezastre naturais iha Timor-Leste.