Reportajen Zevonia Vieira
Embaixada Amérika nia Enkarregadu Negósiu Tom Daley hamutuk ho Xefe Estadu Maiór Interinu F-FDTL Koronel José da Costa ‘Trix’ Soares, Komandante Komponente Terrestre Koronel Domingos da Costa Soares (Dobu), no ofisiál lokál sira selebra ezersísiu Dalan ba Dame ne’ebé remata ona hafoin ezersísiu durante semana rua iha Baucau.
Lihusi komunikadu imprensa, ne’ebe Neon Metin asesu iha loron 4 Agustu inform katak durante ezersísiu Dalan ba Dame, membru sira husi forsa armada Estadus Unidus no Timor-Leste dezenvolve relasaun no hametin sira-nia abilidade ba kuidadu médiku, navegasaun rai, tátika unidade ki’ik, no abilidade enjeñaria. Ba primeira-vez enjeñeiru sira husi Forsa Navál Seabees EUA, Forsa Ezérsitu EUA, ho enjeñeiru husi F-FDTL sira kolabora hamutuk iha atividade konstrusaun enjeñaria nian. Sira-nia esforsu hamutuk foka liu ba hadi’ak klínika médika no projetu sira seluk ne’ebé sai ezemplu ba kooperasaun entre nasaun rua ne’e.
“Ezersisiu tinan ida-ne’e hatudu eventu pioneiru barak hanesan eventu dahuluk husi Navál Seabees EUA no Enjeñeiru sira husi Forsa Ezérsitu Estadus Unidus serbisu hamutuk ho Enjeñeiru sira husi F-FDTL hodi hadi’a klínika médika baze nian, ba dahuluk F-FDTL no membru ekipa bataliaun EUA hamutuk foka ba operasaun, lojístiku, no médiku nian no ba dahuluk Padre Kapelaun Katóliku husi Forsa Aérea EUA nian hala’o atividade relijioza no envolve ativu ho Timoroan nia líder relijiozu sira, nomós ba primeira-vez maka Rhode Island Guarda Nasionál partisipa ona iha ezersísiu ida-ne’e,” dehan Enkarregadu Negósiu Tom Daley. “EUA iha kompromisu ba parseria ho Timor-Leste. Tinan ida-ne’e, ita hala’o ezersísiu CARAT, Asina Akordu Parseria Estaduál ka SPP, no entrega Aviaun Cessna; enkuantu oportunidade aumenta, ami iha intensaun atu fornese nafatin.”
Bainhira ezersísiu Dalan ba Dame Datoluk ne’e remata, atinjimentu no susesu hamutuk ne’e sei dezenvolve kapasidade forsas rua ne’e nian no kria oportunidade ba kolaborasaun liután iha futuru hodi asegura Indo-Pasífiku ida-ne’ebé mak Livre no Nakloke. Estadus Unidus Amérika orgullu halo parseria ho Timor-Leste nomós hatudu kompromisu ba apoia nasaun ne’e nia soberania, seguransa, no prosperiedade.