Reportajen Umbelina dos Reis
Antes selebra loron mundial ba juventude 12 agostu 2023, Alumni Parlamentu Foinsa’e Timor-Leste (APFTL) hamutuk ho estudante Universidade Nasional Timor Lorosa’e (UNTL), Departamentu Peskas Mariña no Juventude Hadomi Natureza (JHN), iha inisiativa kuda ai-parapa oan hamutuk 150, fin de samana ne’e (05/08) iha Metinaru.
Prezidente APFTL, Zaulino Gomes da Silva hatete, objetivu hosi kuda ai-parapa oan ne’e oinsá hare ba joven sira nia kontribuisaun ba floresta no mudansa klimatika iha ita nia rai no nasaun seluk. Mezmu ita nia nasaun ki’ik maibé kontinua konserva mudansa klimátika ho di’ak nune’e bele fó oxijéniu ambiente ne’ebé saudável ba ema hotu.
“Importánsia hosi ai-parapa oan ne’e bele hamatak no haburas rai, i proteje tasi moos nafatin, bainhira tasi siak karik ai-parapa oan sira ne’e bele satan netik.” Dehan Prezidente APFTL, Zaulino Gomes da Silva, ba Jornalista sira iha Metinaru, sábadu, 05/08.
Nia dehan, juventude nia papel halo kontribuisaun ba floresta no ambiente saudável ne’e importante tanba dezenvolvimentu la’o ba oin mós ita estraga ai-horis no ambiente barak, ezemplu iha Tibar dezenvolvimentu ba oin maibé ita moos estraga ai-parapa lubuk ida, nune’e nu’udar sidadaun hatene tesi ai ida, hatene moos kuda fila fali hun ida.
“Tanba ai-parapa ne’e iha rai seluk laiha ona entaun nu’udar sidadaun Timor oan tenki konserva ho di’ak nune’e bele dada turista hosi nasaun seluk mai Timor, nune’e sira hala’o estudu konaba tipu ai-parapa nian, tanba Timor iha hela prosesu de konstrusaun ba dezenvolvimentu.” Nia informa.
Nia enkoraja, hanesan joven sai alternativu ba ita nia rai entaun hola papel agora la’os hein líder sira fó saída mak ita hakarak, maibé hahu investe hosi asaun ki’ik.
