Reportazen Francisco JDA
Centru Integradu Jestaun Krise (CIJK) relata dadus kona ba situasaun moras surtu Covid-19, ne’ebe sai nafatin preokupasaun governu no sidadaun sira.
Liu hosi konferensia imprensa, portavoz CIJK, Dr. Rui Araujo informa ba publiku atu nafatin kolabaora ho governu, hodi implementa medida distansia sosial, individual no kolektivu.
Dr. Rui hateten hahu hosi 15 Maiu, Timor-Leste sai hosi faze naran Alerta Tres (3) no fila fali ba faze 1 ka kontensaun, tanba maske iha Timor-Leste laiha kazu ativu no laiha kazu foun ne’ebe mosu iha loron 34 nia laran ona.
“Ita nia vizinho ne’ebé halo fronteira terrestre ho ita, nia kazu detektadu aumenta bebeik to’o ohin, iha 85 kazus ,nain 3 mak hosi Kabupaten Timor Tengah Selatan (TTS), fontes informasaun hosi Online provínsia NTT nian, inklui mós kazu obitu 1 ka ema mate, tanba Covid-19”, hateten Dr. Rui Araujo Iha CCD, 28/05.
Ho situasaun ida ne’e, Dr. Rui husu nafatin ba populasaun tomak, tenki uja maskra nafatin iha fatin publiku, liu-liu iha fatin selebrasaun relijioza, loja, merkadu no seluk tan.
“Uza maskra taka didiak inus ho ibun, la’ós tara fali iha kakorok, wainhira uja maskra disiplina ho lolos, kontribui makas tebes atu hadook Covid-19 hosi ita nia an no ema seluk”, esplika Dr. Rui ba jornalista sira
