Reportajen Adroaldo “Saretukau”
Ministra Reinu Unidu ba Indo-Pasífiku, Anne Marie Trevelyan hasoru malu ho Prezidente Repúblika, Jose Ramos-Horta iha Palásiu Prezidente, sesta-feira, 29/09.
Iha sorumutu ne’e, Ministra Trevelyan kontente vizita nasaun furak Timor-Leste ho nia knaar nu’udar Ministra Reinu Unidu ba Indo-Pasífiku. Ida ne’e mak nia vizita ministerial dahuluk Reinu Unidu nian mai Timor-Leste, nasaun ida-ne’ebé importante tebes ba Reinu Unidu.
“Ha’u iha diskusaun ne’ebé util tebes ho Prezidente Ramos-Horta no hodi Governu Reinu Unidu nia naran, ha’u hakarak kongratula Prezidente Ramos-Horta kona-ba eleisaun pasífiku no mudansa governu ne’ebé di’ak. Ami hein atu servisu hamutuk ho governu foun tanba ami diskute dalan sira atu hametin ami nia parseria ho Timor-Leste, hodi apoia dezenvolvimentu ekonómiku inklui saúde no nutrisaun.” Dehan Trevelyan ba Jornalista sira iha Palásiu Prezidensial, Ai-tarak laran, Dili.
Nia akresenta, durante nia vizita nia sei lansa mos programa Saúde Reinu Unidu-UNICEF hodi suporta kampaña nasionál Prezidente Horta nian hodi ajuda kombate malnutrisaun labarik.
“Programa ida ne’e sei treinu voluntáriu komunitáriu sira no estabelese grupu apoiu atu enkoraja no fó konsellu ba inan-aman kona-ba prátika ai-han saudável.”
Nia hein tebes atu ko’alia ho detallu liu tan ho sira nia omólogu iha Dili no inklui sira nia parseiru internasionál no interlokutór sira, oinsá Reinu Undu bele suporta dezenvolvimentu ekonómiku no prosperiedade ba povu Timor-Leste.