Reportajen David da Costa
Organizasaun Mundiál Saúde (OMS) iha tempu badak nia laran sei lansa vasina rua hodi kontra moras Dengue. Tanba ne’e Presidente Repúblika José Ramos-Horta husu ba Governu bainhira OMS lasana ona vasina rua ne’e, Governu tenke haree hodi sosa para salva ema nia vida.
Presidente Repúblika (PR), José Ramos-Horta hatetene, foin remata vizita privadu ba iha Nasaun Suisa, vizita ida ne’e privada tanba razaun vizita prinsipál ba Suisa la’os konvite mai husi Governu Suisa, no vizita ne’e la’os ba Kapitál Suisa nian, maibé ba iha Suisa.
“Hau foin remata vizita Privadu iha Suisa, tanba hetan Konvite mai husi grupu ida monarkia antigu, sira maka kaer iha Europa, balun iha Italia balun iha Gresia no Spaynol no sira asosiaun ida iha ne’ebá maka konivida ha’u halo Homenajen fó Kondekorasaun Diploma,”dehan Presidente Repúblika José Ramos-Horta ba Jornalista sira iha salaun VIP Aeroportu Internasionál Nicolau Lobato Comoro, Sexta 6/10.
Maibé iha vizita privadu ne’e, Presidente Republika mós Halo visita kortejeia ho Organizasuan Mundiál Saúde, hodi agradese ba OMS, tanba durante tinan barak nian laran OMS apoiu moral, apoiu polítika ba iha Nasaun Timor-Leste. Nune’e mós ko’alia kona-ba oinsá atu kombate moras malária no dengue.
“Asuntu saida maka importante liu ne’ebé hau ko’alia ho Diretór jeral Organizasaun Mundial Saúde, ida maka kombate kontra malária, iha tempu badak sira deklara ona hanesan iliminavel. Maibé problema bo’ot Timor-Leste nian la’os ona malária maibé dengue. Dengue maka difisil tebe-tebes atu ilimina, hanesan mós rai bo’ot sira dengue makaas,” nia esplika.
Maibé iha tempu badak Organizasaun Mundiál Saúde mós sei deklara iha vasina rua atu kontra dengue. “Kuandu ne’e aplika hau hateten kedas ami hakarak vaisina ne’e”.
Tanba ne’e, estadu Timor-Leste, governu tenke haree sosa kedas vasina ne’e para salva vida kosokoan sira no joven sira. Tanba tinan-tinan udan mai ema lubuk ida nakonu iha hospital.
