Reportajen David da Costa
Elisaun oragaun Suku, iha suku Laisorulai de Cima, Postu Administrativu Quelicai Munisípiu Baucau, Criprano Cabral sai vensedór ho votus 397. Ho nia mandatu foun ne’e nia sei tau prióridade ba iha Agrikultura, Saude, Eduksaun no infraestrutura no kria kampu kampu jogu ba joven sira.
Kandidatu Xefe Suku Laisorulai de Cima, Cipriano Cabral Hateten, nia rekandidatu aan ba fali xefe suku Laisorulai de Cima, tanba razaun fundamentu durante tinan 14 planu dezenvolvimentu halo seidauk hotu, balun halo ona balun seidauk halo, tanba ida ne’e maka motiva nia hodi rekandidatu aan, hodi kompleta fali buat balun ne’ebé seidauk kompleta.
“Hau nia vizaun maka oinsá atu asegura seguransa iha ita nia suku no aldeia no hau nia misaun maka oinsa maka bele atinje hau nia objetivu liu husi planu dezenvolvimentu iha area edukasaun, saude, agriklutura, infraestrutura no fatin desportu ba joven sira,” dehan Cipriano Cabral ba Neon Metin iha sede suku Laisorulai de Cima, Postu Administrativu Quelicai, Munisípiu Baucau, Sabadu 28/10.
Nia haktuir iha nia mandatu foun ne’e nia sei tau prióridade ba iha agrikultura, liuliu natar sira ne’ebé maka abandona, atu ne’e haree orasamentu sira hodi bele investe fali hodi halo moris natar sira ne’ebé abandona, nune’e mos haree infraestrutura, edukasaun, saude no desportu iha suku laran.
“Iha ha’u nia mandatu foun ne’e ha’u sei tau prioridade ba iha agrikultura, iha planu ona, tinan ida ne’e, ami halo investimentu orsamentu husi fundu PNDS nian hodi haree ba natar sira ne’ebé abandona, no tinan ida ne’e ami sei implementa. Konaba bee moos ami hetan fundus husi COVID ninian to’o agora ami seidauk ezekuta, tanba ne’e, iha tinan ne’e ami sei instala bee ba iha suku laran no ami liga mos ba iha area rual hanesan aldeia Uata-Liu, haree mos ba edukasaun tanba iha eskola sira fasildade sira aat hotu no laiha, ida ne’e sai mos prioridade ba konsellu suku sira para haree ida ne’e hodi ko’alia ho Ministru edukasaun hodi bele ajuda, infraestrutura, saude no loke kampu no jogu va joven sira,” esplika Cipriano.
Alende ne’e mós, iha suku Laisorulai de Cima, Postu Administrativu Quelicai, Munisípiu Baucau ne’e iha kandidatu ba Xefe Suku ne’e hamutuk ema nain haat maka hanesan Adelino Cabral da Costa, Cipriano Cabral, Sebastião Pedro da Costa no Timotio Paul dos Santos.
Tuir objervasaun jornalista Neon Metin iha terenu haree katak iha tuku 9:00 htl, sentru votasaun hahú loke no komunidade suku Laisorulai de Cima antusias hodi partesipa iha elisaun orgaun suku. Bainhira kontajen votus iha tuku 3:00 htl, iha suku Laisorulai de Cima, Postu Administrativu Quelicai, Munisípiu Baucau ne’e Cipriano Cabral sai vensedór ho votus 397, tuir maka Sebastião Pedro da Costa ho votus 113, tuir tan maka Adelino Cabral da Costa ho votus 39 no ikus liu maka Timotio Paul dos Santos ho votus 31. Nune’e mós iha mós votus Branku 4 no Nulu 9.
Tuir dados husi Sekretariadu Tekniku Administrasaun Elitoral (STAE), Total populasaun iha suku Laisorulai de Cima, hamutuk 786, no feto 371, mane 415. No total populasaun iha Aldeia Baticasa 432, feto 200 no mane 232. Aldeia Uidaba 227, feto 108 no mane 119. Aldeia Uata-Liu 127, feto 64 no mane 63.
Populasaun ne’ebe maka partesipa iha elisaun orgaun suku iha Laisorulai de Cima, Postu Administrativu Quelicai, Munisípiu Baucau ne’e hamutuk 592 no ema ne’ebé maka la tuir elisaun ne’e 194. No iha suku Laisorulai de Cima iha Sentru votasaun iha fatin tolu no hetan seguransa masimu husi polísia Nasionál Timor-Leste (PNTL).