Reportajen Agustinha Amaral
Xefe Suku Estanislau Borges, Suku Bubusuço, Postu Administrativu Fatuberlihu, Manufahi iha motivu kontinua kandidata aan, tanba hakarak lori povu sira hamriik iha estadu nia oin i hakarak luta nafatin ba dezevolvimento iha baze.
Nia dehan, konfiansa ne’ebé nia simu ona husi komunidade sira, nia sei kontinua halo buat ne’ebé nia bele no sei haka’as aan hodi atende ba komunidade sira i sei halo nia knaar ho di’ak hodi tane sira nia konfiansa hodi fo fiar nafatin ba nia, maibé nafatin iha responsabilidade ba komunidade sira ho programa ne’ebé mak nia sei kontinua halo.
“Ha’u iha programa neen de’it, programa dezevolvimentu komunitáriu, kontinua lori edukasaun sivika ba iha komunidade sira, la servisu mesak de’it maibé iha kultura, relijioju no istória sira, rezolve mos inkluzaun sosial signifika katak la diskrimina moris komunidade nian, nia hola parte iha ne’eba ha’u tenki halo atendementu ne’ebé mak hanesan, hare mos ba saneamentu báziku no meiu ambiente, floresta, haforsa enpoderamentu grupu komunitáriu no juventude ne’e mak prgrama ne’ebé mak ha’u halo.” Dehan kandidatu Xefe Suku Estanislau ba Neon Metin, iha ámbitu Eleisaun Suku, Bubusuço, 28/10.
Inisiativa ne’ebé mak ha’u hakarak kandidata aan ba Xefe Suku tanba komunidade maioria fo konfiasa tomak mai ha’u liu husi ha’u nia atendimentu ba sira ne’ebé lais liu no fasil ba komunidade hodi responde ba sira nia nesesidade, nia hatutan.
Mensajen ba komunidade primeiru mak nia agradese ba konfiansa tomak mak fo ona ba nia, maibé konfiansa hirak ne’e nia sei tane ho liman rua hodi serbi no hana’i ba komunidade tomak.
“Atu husu de’it la bele husik ha’u mesak ha’u sei nafatin hamutuk ho imi, imi mos apresia ho ha’u atu nune’e ita hamutuk hodi dezevolvimentu suku ida ne’e, hamorin suku ida ne’e nomos ba suku seluk no munisípiu seluk no nasional, ha’u laiha hanoin atu fahe komunidade maibé iha prinsípiu ha’u halibur ema hotu-hotu, ne’e mak ha’u husu komunidade sira mai hamutuk ho ha’u, ita lori misaun, vizaun di’ak liu ba ita hotu kontinua ho imi hamriik ho imi servisu ho imi benefísiu ba ita hotu.”
Relasiona ho kandidata feto iha suku Bubusuço, nia dehan sira laiha impedimentu ba sidadaun feto atu hola parte atu kandidata aan ba eleisaun órgaun suku.
“Tinan ida ne’e atu hateten katak sidadaun feto sente sei todan iha Xefe Suku nian, sira la kandidata aan i sidadaun feto sira mos haree ba kondisaun rurais ne’ebé susar tebes ba ita nia inan feton sira atu kandidata aan, karik atu la’o tun sa’e ba Postu no Munisípiu.”
