Reportajen Kontributor Julio Nascimento
Eleisaun membru konsellu suku Bado Ho’o, posto administrativo Venilale, munisípiu Baucau ne’ebé realiza iha loron 28 fulan Outubro 2023, hetan partisipasaun mínimu tebes husi eleitores sira.
Haktuir ba orientasaun lei nù.9/2016, artigo 69 hatete, eleisaun ba membru konsellu suku sira hala’o iha kada aldeia iha território Timor-Leste laran tomak.
Bazeia bá dadus ne’ebé iha, total eleitores iha suku Bado Ho’o hamutuk ema na’in 1.721, maibé sidadaun ne’ebé exerse sira nia direito votus atinji de’it na’in 1.181.
Iha suku Bado Ho’o, eleisaun bá membru konsellu suku hala’o iha sentru votasaun 5 ka realiza tuir iha kada aldeia hanesan Uma Ana Ico, Uatu Bela Oli, Cai Ae Tula, Uai Bobo no Uai Cana.
Iha aldeia Uma Ana Ico ho total eleitores hamutuk na’in 408 (feto 204, mane 204) enkuanto sira ne’ebé tuir vota na’in 282. Aldeia Uatu Bela Oli ho total eleitores hamutuk na’in 159 (feto 80, mane 79), enkuanto sira ne’ebé tuir vota na’in 106. Aldeia Cai Ae Tula ho total eleitores hamutuk na’in 293 (feto 140, mane 153), enkuanto sira ne’ebé tuir vota hamutuk na’in 200. Aldeia Uai Bobo ho total eleitores hamutuk na’in 423 (feto 201, mane 222) enkuanto sira ne’ebé tuir vota hamutuk na’in 294. Aldeia Uai Cana ho total eleitores hamutuk na’in 438 (feto 204, mane 234) enkuanto sira ne’ebé tuir vota hamutuk na’in 282.
Número votantes ne’ebé lá exerse direitu votu hamutuk ema na’in 540.
Xefe aldeia Uma Ana Ico, Manuel António Ximenes, klarifika razaun votantes barak la partisipa, tanba balun bá servisu iha rai liur, balun moras, no asuntu família seluk tán.
Tuir orario husi órgaun eleitoral hanesan Servisu Téknico Administrasaun Eleitoral (STAE) no Komisaun Nasional Eleisaun (CNE), prosesu votasaun rasik hahú iha tuku 08:00 dader no remata iha tuku 15:00 loraik otl.
Remata tiha prosesu eleisaun, presidente meza assembleia suku hamutuk ho parte STAE, CNE no observador nasional hahú halo kontagem votus iha kada sentru votasaun ne’ebé termina iha tuku 20:00 otl. Hafoin ida ne’e, iha loron 29 Outubro, mais menus tuku 09:30 dader otl, hahú kontagem votus no apuramentu husi resultado eleisaun nian ne’ebé realiza iha sede suku Bado Ho’o.
Eleisaun membru konsellu suku bá período 2023-2030, iha suku Bado Ho’o kompete husi kandidatura na’in 10 (feto 1, mane 9). Kandidatura hirak ne’e mak hanesan Ancelmo Benjamin Amaral hetan votus 84 (9,08%) Câncio Do Rêgo hetan votus 95 (10.26%), Eugénio Cosme Guterres hetan votus 154 (16.64%), Eldina Joana Da Costa hetan votus 105 (11.35%), Hermenegildo Da Costa Soares hetan votus 40 (4.32%), Marcos Antônio Ximenes ne’ebé re-candidato hetan votus 126 (13.62%), Mariano Godinho hetan votus 127 (13.72%), Mateus Guterres hetan votus 97 (10.48%), Nicolao Virgílio Guterres hetan votus 112 (12.10%) no Pedro Do Rosário hetan votus 15.02%).
Alende ne’e votus branco iha suku Bado Ho’o iha 14 no votus nulu iha 86, nune’e total votus hamutuk 100.
Presidente meza assembleia suku, Elias da Costa Guterres hatete, resultadu eleisaun hatudu katak, entre kandidatura na’in 10 ne’ebé kompete, iha de’it kandidatu Eugênio Cosme Guterres (16.64%) no Pedro Do Rosário (15.02%) hetan votus barak.
Tuir kritéria ne’ebé iha, atu manan maioria kandidatu ida tenke hetan votus to’o 50.01%.
“Husi resultadu ne’ebé itá hotu haree, laiha kandidatu ida mak manan ho votus maioria. Tanba ne’e iha de’it kandidatu na’in rua mak bele avansa ba segunda volta,”esplika presidente meza assembleia ne’e iha sede suku Bado Ho’o, Domingo 29/10.
Remata tiha prosesu kontagem votus no apuramentu husi resultado eleisaun nian, kandidatu Eugênio Cosme Guterres afirma katak, sei halo servisu makas, liliu halo aproximasaun no konvense eleitores sira atu bele hola parte di’ak liután iha eleisaun tuir mai.
Enkuanto kandidatu Pedro Do Rosário mós afirma katak, partisipasaun eleitores nian ne’e importante tebes, tanba ne’e iha eleisaun segunda volta nian precisa eleitores nia partisipasaun, atu nune’e bele hola parte iha festa demokrasia ne’e.
Hanesan kandidatu feto úniko, Eldina Joana Da Costa konsiente katak, nia parte respeita tebes desizaun povu nian, maske hetan de’it votus 11.35% iha ámbitu eleisaun bá órgaun suku tinan ne’e nian, nia parte sente kontente hodi simu rezultadu ne’ebé komunidade sira fó ona bá nia. Tanba demokrásia nia dalan mak nune’e duni, povu mak hili, no povu rasik mak determina.
Bainhira termina tiha prosesu kontagem votus no apuramentu husi resultado eleisaun nian iha sede suku Bado Ho’o, órgaun eleitoral sira kontinua keras lori material sensitivu ne’e iha posto administrativo Venilale hodi kontinua entrega bá CNE no STAE Baucau hodi halo verifikasaun.
Tuir orario ne’ebé CNE no STAE fó sai, eleisaun membru konsellu suku ba segunda volta nian sei hala’o iha loron 13 fulan Novembro 2023.
Eleisaun membru konsellu suku ne’ebé realiza iha suku Bado Ho’o rasik hala’o iha situasaun hakmatek, no hetan apresiasaun makas husi parte Polícia Nasional Timor Leste (PNTL) eskuadra Venilale, tanba populasaun sira maduro ona hodi kontribui bá paz no estabilidade.
