Home Notisia Kazu Membru F-FDTL Baku Sivil, Mahein Husu Atu Haktuir Rekomendasaun CHEGA!

Kazu Membru F-FDTL Baku Sivil, Mahein Husu Atu Haktuir Rekomendasaun CHEGA!

556
0
Diretor Fundasaun Mahein Joao Almeida. [Foto: Francisco JDA | 15.05.2020]

Reportazen Zevonia Vieira & Santina Lucia

Relasiona ho Membru Parlamentu Nasional ne’ebe kondena membru F-FDTL halo agresaun fiziku hasoru komunidade, ba jornalista sira iha palacio Prezidensia, Xefe Estadu Maior Jeneral FALINTIL, Forsa Defeza Timor-Leste (F-FDTL), Major Jeneral, Lere Anan Timur hateten seidauk simu keixa formal. Bainhira iha ona keixa formal, sei husu responsabilidade ba soldadu ne’ebe komete, maibe Xefe Estadu Maior Jeneral la konkorda ema sivil, tau liman nafatin ba  nia soldadu.

“Hau seidauk simu keixa formal ida. Kuandu simu keixa formal ona, hau sei husu responsabilidade ba hau nia ema ne’ebe ke komete. Maibe hau mos la konkorda ema sivil tau liman nafatin ba hau nia soldadu”, hateten Maijor Jeneral, Lere Anan Timur ba jornalista sira hafoin enkontru ho Prezidente Republika iha Palasiu Prezidensial Nicolau Lobato, Aitarak-Laran, loron, 29/7.

Iha okaziaun ne’e, Major Jeneral Lere hateten ONG Mahein uluk lakohi ukun-an karik. Afirmasaun Jeneral Lere nian ne’e mosu tan Fundasaun Mahein nia deklarasaun ne’ebe “kompara fali Forsa Defeza hanesan Tentara Nasional Indonesia (TNI).” Ho hirus Jeneral Lere refere ba ONG Mahein ho liafuan “nia mos hein loron ida sei simu ninian. Forsa viola direitus umanus duni aplika ba nia, depois mak dehan viola direitus umanus tanba aplika ba nia.”

“Forsa labele sai vitima, vitima ba funu ne’e bele, maibe sai vitima ba komunidade ne’e hau la konkorda. Ezemplu, foin dadauk kazu ida iha Manu-Meta Raihun, soldadu tauk tama iha uma, ninia maluk atu ba foti sai mai baku iha nia odamatan, ne’e informasaun ida hau rona, hau seidauk iha relatoriu, ne’e ikus mai mak hau rona, hau rona iha momentu ne’eba karik hau mak mobiliza kompania ida buka boatomak ne’ebe baku”, afirma Lere Anan Timur.

Lere hateten “ita laos ema estranjeiru, depois ONG Mahein mak simu osan Australia  no Amerika nian seidauk to’o, hakarak hatama tan kanuru tohar ba militar ninia asuntu.” Tuir Jeneral Lere,  Timor demokrasia la hanorin hanesan ne’e. Militar ne’e militar ninian, ema ida sivil laiha direitu, laiha kompetensia tan atu hatama nia kanuru tohar. “O kritika ne’e, kritika baku ema ne’e fo evidensia, laos ba koalia iha media, enkuantu ninia komandante seidauk hatene”, hateten Lere

Nune’e Lere apela ba Organizasaun Naun-Governamentais liuliu Mahein ne’e atu labele ataka beibeik nstituisaun F-FDTL. “Bainhira ataka beibeik hau, hau hatete ba nia loron ida Forsa Armadas sei viola direitus umanus ho nia, lori ba Tribunal hau mak responsabiliza no hau mak responde”, Lere reafirma.

Hatan ba deklarasaun hosi Major Lere Anan Timur, Neon Metin halo konfirmasaun ho Direitor Fundasaun Maehin Joao Almeida. Ba Neon Metin Joao Almeida hatan Fundasaun Mahein foti kazu konaba membru F-FTDL baku ita sidadaun sira iha Liquisa no kazu iha Manu Metan Raihun. Kazu ne’e akontese iha loron 23 Julhu iha Manu Metan Raihun  no iha Liquisa 22 Julhu.

“Hosi kazu ne’e ita hare katak iha momentu ne’eba Fundasaun Mahein atu halo investigasaun ba elementu F-FDTL sira ne’ebe involve iha kazu agresaun fizika, hasoru sidadaun sira. Portantu kazu sira hanesan ne’e akontese bebeik ona, ne’ebe involve membru sira hosi forsa seguransa nian”, hateten Joao Almeida via telefone

Joao Almeida hateten Fundasaun Mahein hanesan organizasaun sosiadade sivil, hanesan sidadaun iha direitu hatoo opiniaun no observasaun relasiona ho situasaun sira rai laran. Ho nune iha kazu ida ne’e, involve forsa seguransa sira ne’e lei garantidu, sidadaun hotu partisipa bele fo opiniaun hanesan ema mesak ka individu ka liuhosi organizasaun.

Relasiona ho komportamentu hosi forsa armada nian ne’e, Fundasaun Mahein husu ba F-FDTL atu hadia no membru ne’ebe involve iha kazu ne’e, tenke responsabiliza mos, tanba kazu ne’e mos vitima hatoo ona keixa ba Kuartel Jeneral no Polisia Militar rasik.

Joao Almeida haforsa katak iha relatoriu CAVR nian, ne’ebe bolu naran relatoriu CHEGA! Mos hatoo katak hahalok sira hanesan ne’e labele repete, “hatoo ba ita nia forsa armada no seguransa sira atu implementa tuir rekomendasaun CHEGA!, tanba ne’e mak ita husu hodi bele konsidera no husu ba F-FDTL no PNTL atu foti medida displinar no halo investigasaun, atu nune’e bele iha justisa.

Tuir informasaun ne’ebe Neon Metin rekolha hosi Fundasaun Mahein katak kazu ne’ebe involve soldadu F-FDTL la uza farda.  Bainhira akontese, soldadu ne’e rasik kontaktu nia maluk sira hodi ba halo atuasaun, maibe to’o iha ne’eba sira la halo atuasaun, sira justru involve mos iha agresaun fizika hasoru membru komunidade. Iha fatin akontesimentu no soldadu sira ne’ebe mak hetan kontaktu mai ho ho farda ho kilat, maka baku vitima iha area Manu Metan Raihun nian.

“Ami husu forsa no seguransa nia misaun no kompetensia, hodi proteje sidadaun sira. Kuandu sidadaun sira iha ameasa nia laran, atu iha rai laran ka rai liur. Kazu ne’ebe akontese ba sidadaun sira ne’e inaseitavel, katak buat hotu neebe ita la aseita atu akontese. Tanba ne’e,  iha kazu nee, ita husu atu loke investigasaun hodi aplika regra disiplinar ne’ebe bolu regulamentu disiplinar militar nian”, hateten Joao Almeida ba Neon Metin

Tuir relatoriu hosi Fundasaun Mahein ne’ebe Neon Metin asesu, esplika katak Kumprimentu Disiplinar sai dezafiu ba instituisaun PNTL no F-FDTL. Ita hakarak forsa tenki ‘disiplina no sai ezemplu’, hodi halibur Timor oan tomak, la’os sai fali fatór sobu, hases no hadok ema. Istoria hatudu kontrariu, kuantu mais imi loko an, mais ema hases-an ba imi, mais ema hatun imi, mais ema minimiza imi. Lia menon ne’e hato’o hosi Jeneral Taur Matan Ruak iha tempu ne’eba.

Hahalok kona-bá PNTL no F-FDTL nian regula ona iha lei no regulamentu aplikavel sira seluk. Lei Organiku PNTL maka regula kona-bá karakteristiku PNTL, inklui Regulamentu Disiplina PNTL (RDP) maka orienta kona-bá PNTL nia disiplina.

Hanesan relata ona iha artigu balun ne’ebé ko’alia kona-bá PNTL nia karakteristiku no disiplina. Lei RDP dehan, disiplina tenki kumpri ho rigor ba lei jeral no lei aplikaval seluk kona-bá PNTL.

Iha Regulamentu Disiplina Militar (RMD) dehan, militar tenki kumpri ninia kna’ar hotu-hotu, hamtauk direitu ema nian, hakruk ba autoridade hierarkia, sakrifika interese pesoal ba diak interese kolektivu tuir konstituisaun no lei aplikavel seluk.

Iha RDM artigu 4 mos koalia kona-bá “dever militar” ne’ebé maka respeita autoridade sivil sira, trata mos sira ho dalan konviniente, la pratika asaun ne’ebé maka la tuir moral publiku no mos dignidade no onra militar.

Disiplina militar maka sai lasu moral no obrigasaun atu kumpri tuir prinsipiu justisa. Maske regulamentu klaru ona maibe oknum PNTL no F-FDTL seidauk kumpri ho didiak iha pratika serbisu no ikusmai komete krime, halo violensia no atitude sira ne’ebé la iha disiplina.

Iha relatoriu Fundasaun Mehein mos mensiona katak, ida ne’e bele kria hela odiu no vingansa iha joven sira nia hanoin, iha momentu ida ne’ebé sira frustradu tanba laiha serbisu, entaun aproveita oportunidade hodi baku militar sira bainhira la hala’o serbisu ofisial (fora de servico).

“Pior liu tan maka oknum F-FDTL sira konfronta malu iha komunidade nia leet, no lakohi hakruk ba malu. Durante Fundasaun Mahein nia monitorizasaun ba instituisaun PNTL no F-FDTL, iha ona akontesimentu lubun ne’ebé ema sivil sira tenta atu oho, asaltu no halo agresaun fiziku hasoru membru PNTL no F-FDTL sira” tuir observasaun FM rekolla katak membru PNTL no F-FDTL balun mate ona tanba hetan oho husi ema deskuiñesidu.

LEAVE A REPLY

Please enter your comment!
Please enter your name here