Home Notisia AJTL ho FMTL Rejeita Total Esbosu Lei Kriminaliza Defamasaun

AJTL ho FMTL Rejeita Total Esbosu Lei Kriminaliza Defamasaun

713
0
Asaun pasifiku kontra esbosu Lei Kriminaliza Defamasaun. [Foto: Paqhar Malay | 03.08.2020]

Reportazen Francisco JDA

Front Mahasiswa Timor-Leste (FMTL)  koopera hamutuk ho Asosiasaun Jornalista Timor Leste (AJTL) no organizasaun sosiadade sivil, realiza asaun pasifiku hodi kontra esbosu Lei Kriminasaun Defamasaun, tanba bele hamate Liberdade imprensa no espresaun.

Porta-Voz FMTL, Nivelino dos Santos Iha diskursu hateten asaun pasífiku ida ne’e atu hatudu matenek no kapasidade katak kontra Lei Kriminaliza defamasaun

“Ohin loron ita hatudu katak, ita matenek no  iha kapasidade liu sira, tanba ne’e mak ohin ita reafirma ita nia an iha ne’e, esbosu ne’e atu eduka sosiedade ne’e salah no la los, atu eduka ema investe iha seitor edukasaun”, hateten Porta Voz FMTL iha Liceu, 03/08.

Iha fatin hanesan Prezidente AJTL, Zevonia Vieira hateten AJTL rejeita totál Lei Kriminaliza Defamasaun tanba uluk  maun boot sira uza sira nia Liberdade espresaun no halo serbisu imprensa nian iha tempu okupasaun Indonesia, hodi hetan Liberdade no ohin loron Timor ukun rasik-an

“AJTL rejeita total no hateten lae ba esbosu lei kriminaliza defemasaun, AJTL kontinua hakilar defende liberdade imprensa no espresaun. Ita hatene katak Konstituisaun RDTL Artigu 40 no 41 fo esplika klaru konaba liberdade imprensa no Liberdade ba informasaun no espresaun, tanba se lei nee aprova, ita sei viola konstituisaun RDTL no prinsipiu internasional sira ba direitus humanus nian”, hateten Zevonia Vieira.

Zevonia relata katak tuir World Report Freedom Index no Reporters without Borders hatudu dadus katak Timor-Leste nia Liberdade imprensa no espresaun ranking 1 iha sudeste asiatiku no iha munidal Timor-Leste rangkin 78, ida ne’e hatudu katak Konstituisaun RDTL diak liu ona no demokrasia iha Timor-Leste lao diak.

Nia hatutan AJTL lakohi jornalista tama komarka, tanba hato’o informasaun kritiku sira konaba ukun nain sira, bainhira povu kbiit laek sira no sosiadade sivil sira hatoo protesta, jornalista sira sensura sira nia an, hodi la hakerek ona artigu kritiku sira tanba iha situasaun tauk nia laran.

Iha asaun refere manifestante sira lori spanduk ne’ebe hateten “tolok laos defamasaun, labele kriminaliza defamasaun, labele hamate liberdade imprensa no espresaun, abaixo esbosu Lei Kriminaliza defamasaun, labele lori ema ba prizaun tanba deit tolok”.

Asaun pasifiku ne’ebe halao iha liceu lao ho hakmatek no hetan seguransa hosi Polisia Nasional Timor-Leste (PNTL). iha asaun refere hetan partisipasaun hosi membru Asosiasaun Jornalista Timor Lorosa’e, sosiadade sivil no estudante universitariu sira.

Tuir planu ekipa FMTL hamutuk ho AJTL no sosiadde sivil sei entrega petisaun ba Ministeriu Justisa hodi ezije hapara esbosu Lei Kriminaliza Defamasaun.

LEAVE A REPLY

Please enter your comment!
Please enter your name here