Reportazen Francisco JDA
Trabalhador Sessional Worker Program ( SWP) nain 15 halo konferensia imprensa, relasiona ho Sekretario Estadu Formasaun Profesional Empregu (SEFOPE) ne’ebe kansela sira ba servisu iha Austrália, maske sira deklara katak asina ona kontratu kompletu.
Tuir sira hateten nain neen mak teste ona médiku sira la iha moras, nain haat seluk asina ona kontratu maibé SEFOPE dehan Half ID mak expire seluk, mak sistema la simu no nain tolu seluk mak sae tiha aviaun maibé depois ema haruka tun fali ho razaun katak aviaun mak todan liu no la konsege ba Australia.
Tuir Porta Voz nain 15 ne’ebe hetan kansela ba servisu iha Australia, Adao Exposto Ataide Soares ba jornalista sira hateten, SEFOPE presiza esklarese didiak kona ba kontratu ne’ebe asina, tanba saida mak akontese no la iha preparasaun ne’ebe mak diak, atu prepara trabalhador timoroan ba servisu iha Australia.
“Sekarik imi kansela tiha ami hanesan ne’e, ami lori osan boot mak teste médiku, se teste tan médiku atu ba servisu imi garante mai ami ka lae, karik vaga sira tuir mai ne’e tenke tau ami prioridade, Stamford tenke fo gratuita ba ami atu test mediku nian ka medical test, tamba ami selu ho osan boot $305.00 ba feto, $295 ba mane”, deklara portavoz trabalhador nain 15 iha Jardim 5 de Maiu, 03/12.
Trabalhador nain 15 ne’e sujere ba SEFOPE atu hadia sistema ne’ebe diak, hodi garante efisiensia no efetividad. Sira husu ba future tenke hadia linha koordenasaun diak entre SEFOPE ho Stanford, kompania no imigrasaun.
“Tenke hadia regras balun liu-liu trata dokumentus sira, tamba balun ita hare katak laiha bom komportamentu mos bele ba hotu, balun fali la tuir test COVID-19 mos ba hotu, hakarak husu atu SEFOPE telefone ba kolega sira ne’ebe kanseladu sira ne’e no bolu mos stamford atu ita tur hamutuk buka solusaun ba ami nia problema ne’e”, dehan Porta Voz
Iha Fatin hanesan, traballadór ne’ebe hetan kansela hosi SEFOPE, Beatris Soares Babo ba Neon Metin hatete katak SEFOPE mak fo kanselamentu ona molok atu ba, maibé derepenti naran ema bolu fali iha Aeroportu atu ba fali serbisu afinál SEFOPE kansela ona.
“Iha loron1 loraik oras tuku 06:00 ami nain ne’en hetan kanseladu, iha dia 2 kolega seluk atu arranka ba Australia. Hau iha uma no hau la prepara atu ba, derrepente hau nia naran bolu fali iha Aero Portu ema repete ba repete, maibé hau iha uma ona, hau nia bin mak buka hau iha Aero Portu laran maibé hau la ba, hau nia bin husu staff sira dehan Beatris Soares Babo iha laran ona, kona ba saúde no kontratu asina ona, maibé SEFOPE mak kansela, hau mos lori ona família ba deklarasaun iha loron 2 atu arranka, SEFOPE hatete katak kansela tanba ami nia data expire maibé kontratu hotu ami asina ona”, dehan Beatris Soares Babo
Naran hirak ne’ebe hetan kansela hosi SEFOPE atu ba serbisu Iha Australia ho Kazu la hanesan, Adao Exposto Ataide Soares, Alda da Costa Freitas Vaz, Biatris Soares Babo, Arlindo do Santos Bosco, David Lucas Freitas, Evangelino Fernandes da Silva, Atanasia Belo, Apolinario Rosa de Jesus, Alexo Amaral Ataide, Ana Mendonça, Dirce Fatima Lopes Belo, Gualdin Santana R.G. Oliveira. Leonardo Belo Moniz, Hilario no Irene Soares
Bainhira Neon Metin hasae notísia nee, sedauk halo konfirmasaun ho parte SEFOPE.
