Reportajen Zevonia Vieira
ONG Fundasaun Haburas, liu husi fundu husi DW Akademie, Alemaña, kontente atu implementa projetu rejional ida ne’ebe buka atu suporta membru jornalista husi nasaun sira iha Sudeste Aziatiku inklui Timor-Leste atu melhora kualidade kobertura konabá mudansa klimátika liu husi media no rede sira. Treinamentu ida ne’e parte husi projetu ba rejiaun Sudeste Asiátiku naran “Let’s Talk Climate! Informasaun no Komunikasaun konabá Tópiku Klima nian.” Partisipa nain 10 iha treinamentu ida ne’e mai husi média iha Dili laran hanesan NeonMetin, Diligente, Jornal Independente, Radio Liberdade, Media Mudansa, Media Rede ba Rai, no Media Associação HAK.
Treinamentu ne’e realiza online durante loron rua husi 12-23 Juñu, no realiza oin-ho-oin husi 24-26 Juñu iha Cruz Vermelha Timor-Leste.
Nasaun sira iha Sudeste Aziátiku mak ida husi rejiaun iha mundu ne’ebe ekolojikamente vulneravel. Alterasaun klimátika no nesesidade ba rekursu umanu ne’ebe aas, kauza husi kreximentu ekonómiku no aumentu populasaun rezulta problema ambiente ne’ebe grave no ameasa vida-moris ba milaun husi ema. Parte husi populasaun ne’ebe afetadu mak babain ema vulneravel liu iha komunidade: feto, foinsa’e sira, ema rai-nain (indíjena), ema etnia minoria sira, ema defisiente, no membru husi grupu marjinalizadu.
Treinador iha treinamentu ne’e mai husi jornalista senior internasionál husi Narasi TV, Indonesia, DW Akademie, Alemanha, no média lokál NeonMetin. Kuríkulu ba treinamentu foka ba asuntu balu hanesan hanesan jornalizmu investigativu, jornalizmu konstruktivu, intelijénsia artifisiál (AI), jornalizmu sidadaun, seguransa no vijilánsia média, Open Source Intelligence, narasaun, produsaun vídeo, no lei no polítika ambiental iha Timor-Leste.
Diretór ONG Fundasaun Haburas sente importante atu ita-nia jornalista lokál sira hetan treinamentu iha área jornalizmu ambientál. Tuir nia, treinamentu ida ne’e nia objetivu mak atu haklean sira-nia abilidade iha área sira hanesan investigativu, jornalizmu konstruktivu, mapamentu, seguransa jornalista nian atu prepara sira atu sensitivu liután ba problema ambiente no mudansa klimátiku nian, no integra isu ambiente iha notisia sira. “Média iha papél bo’ot ba konsientizasaun komunidade konabá ambiente, entaun treinamentu ne’e aliña debes ho misaun Fundasaun Haburas nian. Ita kontente hetan treinadór internasionál husi Narasi TV no DW Akademie no mós ita-nia média lokál NeonMetin ne’ebé fahe sira-nia matenek durante loron 2 online no loron 3 oin-ho-oin iha Dili,” haktuir Vieira iha fatin treinamentu.
Neon Metin hanesan parseiru no treinadór lokál hamutuk ho Fundasaun Haburas. Tuir Xefe Redasaun NeonMetin, Ato Lekinawa Costa, Timor-Leste nia média sira-nia kobertura notisia sei iha nivel “mainstream” ka kobre buat hotu, no ita la halo espesializasaun ba área ida-idak. Maibé, nia pontu forte ida mak asuntu importante sira hanesan problema ambientál no oinsá mudansa klimátiku afeta ita-nia komunidade sira, ne’e ita-nia jornalista sira bele mainstream tiha iha notísia ne’ebe públiku babain konsumu. “Ha’u hanoin ida ne’e dezenvolvimentu ida ne’ebe diak. Ha’u kontente haree ita-nia jornalista sira prepara sira-nia “pitching” iha notisia ambiental ne’ebé Timor-Leste agora dadauk enfrenta, no hetan mentoria direta husi ita-nia jornalista lokál no internasionál sira konabá oinsá atu haforsa sira-nia notisia. Kuríkulu treinamentu sira prepara ita-nia jornalista sira laós de’it atu halo kobertura ba kestaun ambiente maibé iha kestaun sosiál hotu.” nia haktuir. Iha loron tolu nia laran, NeonMetin observa katak jornalista sira aprende aproximasaun foun, iha kontextu Timor-Leste, ba atividade jornalístiku nian. Jornalista aprende konabá jornalizmu konstrutivu no mós oinsá uza Open Source Inteligence ba atividade jurnalistiku. Materia hirak ne’e fornese husi treinador sira mak iha experiénsia rejionál no mos internasionál, hanesan Narasi TV hosi Indonesia ho Deutsche Welle.
Iha Novembru tinan ida ne’e, partisipante nain rua sei hetan selesaun atu ba halo kobertura iha konferénsia mudansa klimátika COP iha Azerbaijan.
