Home EduTek Governu Muda Bolsa Hakbiit Ba Bolsa Parsial, Grancindo & Genicia Sei Susar...

Governu Muda Bolsa Hakbiit Ba Bolsa Parsial, Grancindo & Genicia Sei Susar Remata Estudu, Tan Moris Kbiit Laek

2243
0
Estudante Grancindo & Genicia. [Foto: Umbe | 27.06.2024]

Reportajen Umbelina dos Reis

Bolseiru Universidade Catolika Timorense (UCT), Gracindo da Costa Soares (21), oras ne’e da-dauk tuur iha banku semestre III, iha Fakuldade Edukasaun, Departamentu literatura língua Português  hateten, banhira nia rona de’it isu-isu katak governu atu muda  bolsa hakbiit ba fali bolsa parsial, nia sente laran triste tebes. Desizaun governu muda duni, nia sente katak nia mehi atu remata nia estudu iha ensinu superiór ne’e sai oinsá loos?

“Ha’u aprofunda oi-tuan ha’u nia istoria hosi ki’ik ate agora, nu’udar povu agrikultor nia oan, banhira hetan oportunidade bolsa hakbiit ne’e sente kontente tebe-tebes, tanba hanoin katak aproveita oportunidade ne’e atu remata ha’u nia estudu iha nivél superior. Tanba ha’u sei tur iha banku ensinu báziku (SMP), inan-aman selu de’it trimestral propinas nian susar loos, sei debe hela osan, hakiak animal sira ne’e boot hodi fa’an hafoin selu. Kontinua SMA mai eskola iha Díli maibé hela iha Hera ho maun, esforsu rasik kuda modo mak selu bemo, foto kopi no sosa kadernu no lapizeira, konsege remata iha ensinu sekundáriu.” Gracindo da Costa Soares konfesa ba Neon Metin, ho laran triste nakonu ho matan wen, iha jardin 5 de maio, kinta-feira, 27/06.

“Nune’e teste ba bolsa hakbiit Grasa de Deus naran sai iha lista FDCH, sente laran kaman oituan tanba bele ba tuur iha banku ensinu superior, maibé na realidade kontente ne’e loron sorin de’it. Governu muda duni ona bolsa hakbiit ba bolsa parsial sente kalah eskola para duni ona. Tanba hateke fila ba kotuk atu husu osan ba inan-aman maibé laran moras loos, sira laiha osan, oinsá sira bele suporta hodi kontinua estudu ida ne’e.” Nia dehan.

Nia dehan, laiha ema ida atu suporta nia, tanba ohin loron mundu teknolojia buat hotu depende ba osan, familia simples, hakarak atu atinje hodi realiza mehi ne’ebé loro-loron hanoin hela maibé susar tebes tanba atu tane liman ba se no husu loos ba se?

“Dau-daun ne’e hela ho tiu, maibé osan kustu de vida hapara ona, entaun laiha osan atu fotokópia no selu bemo ou nesesidade báziku, uluk SMA ne’e hela iha Hera hodi esforsu rasik kuda modo, maibé Universidade mai hela iha Díli ho tiu, susar tebes atu kontinua estudu ida ne’e. Tanba Semestre ida selu $200 ne’e sira kontinua selu ne’ebé di’ak, maibé nesesidade báziku ne’e mak todan.” Nia hatutan.

Entre tantu, bolseira ida hosi, Institutu Ciência de Saúde (ICS), Genícia Livia da Costa (19), agora da-dauk Semestre III iha Departamentu Ciênsia Biomedika laboratorium, hateten, foun-foun asesu ba bolsa hakbiit asina kontratu to’o tinan tolu signifika ami eskola to’o remata D3. Maibé realidade seidauk to’o tinan tolu sira muda ona ami ba bolsa parsiál.

“Signifika sira hapara ona ami nia kustu de vida, oinsá ami bele moris ho situasaun sira ne’e, sedangkan ami uma laran maun-alin hamutuk na’in 10, oinsá inan-aman bele fo osan mai ami ba fotokópia sira ne’e, transporte no nesesidade báziku. Pai moras Struck iha uma de’it, mae fa’an dose mak hare ami uma laran, sente bainhira muda ona ami ba parsiál dala-ruma eskola to’o dala klaran de’it ona.” Dehan Genícia Livia da Costa ba NeonMetin, ho lian nei-neik, iha jardin 5 de maio, kuarta-feira, 27/06.

Nia hatutan, sente laiha kbiit atu remata nia misaun no visaun iha ensinu superior ICS, tanba sira hosi familia ne’ebé ekonomia sufisiénte tebe-tebes, nune’e laiha kbiit atu fasilita nesesidade báziku. Mezmu durante tur iha banku ensinu superior ne’e hetan valor di’ak.

Rekomenda ba parte governu bele muda bolseiru sira ne’ebé mak valor minimu ka kiik, maibé kontinua ba bolseiru ne’ebé valor standar no masimu ne’e. Tanba ema barak hakarak aproveita oportunidade ne’e.

Entre tantu Oranizasaun Bolseiru Hakbiit Timor-Leste (OBTL), la konkorda konaba revogasaun  subsidiu bolsa hakbiit ne’ebé muda fali ba bolsa parsial, ne’ebé halo esudante bolseiru universitariu sente triste tebes tanba nu’udar povu ai-leba oan laiha kbiit, bainhira governu muda sira ba fali bolsa parsiál, tanba prejudika ba sira nia nesesidade báziku loro-loron nian.

“Tanba ne’e, liu hosi  baze dekretu lei númera 13/2020, 15 de abril, kona-ba regulamentu FDCH no Diploma Ministerial no. 9/2021, 10 de março, VIII governu Konstituisionál oferese bolsa ho tipu integral ka hakbiit ba estudante sira ne’ebé kategoria inan-aman la iha kbiit. Objetivu husi bolsa ne’e atu tulun ami kbiit la’ek nia-oan sira hodi bele asesu ba ensinu superior iha rai laran. Tuir dadus ne’ebe Fundu Dezenvolvimentu Kapitál Humanu (FDCH) fo sai iha 30 de abril de 2024 katak, estudante sira ne’ebé asesu ba bolsa hakbiit, dadaun ne’e eskola iha ensinu superiór públiku tantu privadu hamutuk sanulu-resin-neen (16) ho totál estudante 3.030.” Dehan portavoz Organizasaun Bolseiru Hakbiit Timor-Leste, Reni Gonsalves ba jornalista sira iha jardin 05 de maio, kuarta-feira, 26/06.

Print Friendly, PDF & Email

LEAVE A REPLY

Please enter your comment!
Please enter your name here