Reportajen Joselina Dos Santos
Crus Vermelha Timor-Leste (CVTL), servisu hamutuk Banco Nasional do Sangue no World Health Organization (WHO) hodi realiza Selebrasaun Loron Mundiál Raan ho Tema Global “Ami Moris Tanba Imi Fó”, objetivu hosi selebrasaun ne’e atu louva populasaun sira hodi fornese raan ba ema sira ne’ebe presiza raan.
Hafoin Seremonia, Sekretariu Jeral CVTL, Luis Pedro Pinto hateten, voluntáriu sira ne’ebe oferese raan ba CVTL no ba Banco Nasional de Sangue ne’e sei menus, tanba falta koñesimentu husi populasaun tomak entaun voluntariu sira labele oferese raan maske sira hakarak atu fó sira nia raan ba ema ne’ebe presiza.
“Dalabarak ita haree katak kuandu fornese sira raan iha benefisiu ba sira nomós benefisiu ba ema ne’ebe presiza, tanba ita haree ba persentajem populasaun ne’e la to’o 1% mak fornese raan, tanba ne’e CVTL mai ho nia papel iha área mobilizasaun sosializasaun halo edukasaun ba ema atu oinsá bele voluntariamente oferese sira nia raan atu bele ajuda ema seluk”, dehan, Sekretariu Jeral CVTL, Luis Pedro Pinto iha Edifisiu CVTL Farmoza, Sexta 16/06.
Nia haktuir, Grupu voluntariu ne’ebe CVTL halo aprosimasaun mak universidade, relijaun sira, setor privadu nomós instituisaun governu nian, nune’e CVTL kontinua halo aprosima kada tinan atu nafatin fornese sira nia raan ba ema ne’ebe presiza atu bele salva ema seluk nia vida.
“Ami sei kontunua tanba durante ne’e halo mobilizasaun ran iha Díli deit, entaun ida ne’e sai pontu importante ida katak ba oin governu Timor-Leste hamutuk ho Ministeriu Saúde nomos ho Banco Nasional de Sangue atu oinsa mak bele mobiliza raan ne’e laos deit iha Díli, maibe mos iha Munisipiu atu bele hetan raan barak, ami sei kontinua kontinua programa doasaun raan ne’e to’o iha baze,” nia esplika.
Iha fatin hanesan, Xefi Interina Banco Nasional de Sangue iha HNGV Agustina Alves apresia ba voluntariu sira ne’ebe voluntariamente no hakarak rasik hodi fó raan turuk ida hodi salva ema seluk nia vida, “tanba ita moris ba ema seluk, Ema barak mak presiza tebes raan katak nia hein nia mate, karik nia mate bainhira ema seluk la fó ran ba nia, tanba ne’e iha valor boot ba ema ne’ebe fó raan nomós ba ema ne’ebe simu ran”.
Nune’e mós, Estudante Sols Raul Francisco Belo Faria hatutan, Iha fulan kotuk nia kolega ida nia inan presiza raan O, nune’e nia hakarak oferese raan hodi ajuda nia kolega nia ama, hafoin ida ne’e nia sente isin moras maibé liu tiha loron rua ka tolu nia sente isin kaman tanba konsumu hahan ne’ebe doutór sira koalia ba nia.
“Ha’u kontente tebes bele ajuda ema seluk, tanba nu’udar umanu presiza ajuda malu ba ema ne’ebe presiza tulun liuhosi ita nia raan, nune’e husu ba joven sira labele tauk ajuda ema seluk tanba ema seluk presiza tebes ita nia tulun hodi salva sira nia vida,” nia espresa..
