Reportajen Juvinal Cabral dos Santos
Prezidente Federacao Nacional de Basquetebol de Timor-Leste (FNBTL), Joaquim Jose Gusmao dos Reis Martins hateten, halo kongresu ne’e tanba estrutura sira nia mandatu ne’e tinan haat hahu husi 2019 too 2023 hotu ona, agora halo fali kongresu atu hili fali estrutura foun, konvida nafatin estrutura antigo no asosiasaun sira partisipa nune’e hamutuk hodi deside hili estrutura foun ba iha 2023 too 2027
“Ita hotu hatene katak basquetebol ne’e modalidade ida ne’ebé besik liu ita nia komunidade husi eskola primaria to’o universidade, klubu no mos instituisaun governu sira iha hotu anima ba basquetebol, partisipasaun feto iha basquetebol desde uluk kedas sempre iha antusiasmu tebes tanba ne’e mak ita halo atividade regularmente atu nune’e haree talentu sira iha jogu basquetebol, dehan Prezidente Federacao Nacional de Basquetebol de Timor-Leste (FNBTL), Joaquim Jose Gusmao dos Reis Martins ba jornalista Neon Metin iha Salao Kapela Surikmas, Bairo Pite Dili, 05/12/2023”.
Nia hatutan, liuhosi kongresu ne’e, sira mos aproveita tempu ida ne’e hodi aprezenta relatoriu aktividade ne’ebé durante ne’e halo ona, sekretariu jeral sei aprova relatoriu no aprovasaun mos kodigu konduta hanesan matadalan ida ba atividade hotu-hotu iha basquetebol kongresu ne’e too lorokraik hodi hili estrutura foun
Nia haktuir, kongresu ne’e halao loron ida de’it sira hili estrutura foun maibe antes ne’e dokumentus, draf sira haruka hotu ba asosiasaun hein fali informasaun bainhira asosiasaun konkorda ona estrutura ne’ebe haruka ba ne’e sira hein aprova de’it, kongresu ne’e haree fila fali proposta ne’ebé haruka ba ona no sistema ne’ebé sira uja tuir FIVA antes halo kongresu sira haruka ona estrutura foun nia profile, draf ne’e ba asosiasaun hotu hodi halo komentariu, estrutura ne’ebé sira prepara mak prezidente, vise-prezidente, sekretariu jeral, vise-sekretariu jeral, finansas nian tejoreiru, sira mos iha legal, Konsellu piskal sira sei aprezenta hotu.
“Ita mos agradese tanba hetan apoiu husi UN Women ne’ebé mak durante ne’e ajuda ita introduz Igualdade jeneru no violensia bazeia ba jeneru iha modalidade atividade desportu nian liu-liu basquetebol, Ita halao torneu ne’e iha munisipiu barak ona no susesu, kongresu ne’e ita mos servisu diak ho UN Women nia apoiu nafatin ba ita, dehan Prezidente Federacao Nacional de Basquetebol de Timor-Leste (FNBTL)”, dehan Joaquim
Aliende ne’e, terceiro Congresso Nacional, Federacao Nacional de Basquetebol de Timor-Leste (FNBTL) ho tema hametin & habelar basketbol iha Timor-Leste partisipasaun husi Presidente CONTL, Presidente CDTL, Country Representative KOICA, Head Office UN Women no mos asosiasaun basketbol nain rua kada munisipiu sira.