Reportajen Joselina dos Santos
Fundus Nasoins Unidas ba Populasaun (UNFPA) apoiu Manequim ka Ekipamentu simulador partu ba Escola Superior de Parteira-FMCS-UNTL, Instituto Ciência da Saúde (ICS), no Instituto Superior Cristal (ISC). No Ministru Ensinu Superior Arte no Kultura (MESAK), husu dosente sira atu uza ekipamentu sira ne’e ho kuidadu no hanorin estudante parteira ho koñesimentu hodi tau importansia ba feto no inan isin-rua sira iha Timor-Leste.
Iha diskursu Ministru Ensinu Superior Arte no Kultura (MESAK), José Honório apela ba Reitór no dosente sira ne’ebe hanorin estudante parteira sira uza ekipamentu sira ne’e ho diak no kuidadu liuhosi koñesimentu, nune’e estudante sira remata estudu iha Universidade karik sai parteira ne’ebe diak iha futuru hodi salva inan no oan sira nia vida.
“UNFPA nia apoiu ne’e importante tanba ne’e ita tenke servisu hamutuk atu bele dezenvolve Ensinu Superiór sira iha Timor-Leste atu ajuda ita nia inan no oan sira. Liu-liu servisu parteira nian iha Timor-Leste ema ne’ebe ema ladun respeita feto tanba ne’e husu ba instituisaun hotu-hotu tau atensaun no respeita feto tau iha primeiru no labele tau feto iha segundu atu sira bele luta ba ona sira nia moris”, dehan, MESAK José Honório iha Kampus UNTL Kaicoli, Sexta 26/01.
Iha fatin hanesan, Reprezenta UNFPA iha Timor-Leste Pressia Arifin Cabo, orgullu tebes tanba bele fó apoiu ensinu superiór sira atu hakotu totalidade materna iha Timor-Leste. Tanba parteira no ema sira ne’ebe ho abilidade mak hanesan kuidadores prinsipal ba inan no kosok-oan sira durante periodu gravidez periodu partu no periodu depois de partu, nomos fornese informasaun no servisu konprensivu saúde seksuál reprodutiva nomos papel importante atu promove saúde iha komunidade nia laran.
“UNFPA iha Timor-Leste nia servisu atu apoia no hasa’e kualidade edukasaun parteira nian nomos suporta asosiasaun parteira Timor-Leste desde liña estabelesimentu. Ohin ami suporta ba eskola tolu UNTL, ICS no ISC inklui apoiu dezenvolvimentu kurikulu nasional, estabelesimentu laboratóriu kompetensia baziku nomos suporta dezenvolvimentu kapasidade edukador parteira sira liuhosi apoia sira nia partisipasaun ba treinamentu no enkontru iha nivel nasional rejional nomos internasional”, nia esplika.
UNFPA fokus ba área prinsipal haat mak hanesan haforsa treinamentu parteira ne’ebe bazeia ba kompetensia dezenvolve mekanizmu regulatoriu ne’ebe forte hodi asegura kualidade servisu. Hasa’e parteira sira nia lian liuhosi haforsa asosiasaun parteira no halo advokasia hodi hasa’e investimentu iha servisu parteira nian.
Vise-Reitór UNTL ba Asuntu Administrasaun Finansa no Administradór Jeral Helio Xavier Mauquei, Agradese ba UNFPA nia kontribuisaun tanba importante tebes liga ho ema nia vida oinsa atu bele fó partu ba inan isin-rua sira, nomos enjeral ba inan no oan sira nia saúde iha nasaun ida ne’e. Espera sei kontinua nafatin apoiu ba joven sira nomos ba alin sira ne’ebe halao kursu iha área ida ne’e atu dezenvolve setor saúde iha Timor-Leste diak liu tan.