Reportajen Silvino Freitas
Relasiona ho hapara profesor kontratadu ne’ebé dadaun ne’e sai nafatin preokupasaun maka Primeiru Ministro Kairala Xanana Gusmão dehan, profesor kontratadu ne’ebé ejiji hela iha ministeriu edukasaun vila-verde tenke pasénsia hodi hein prosesu rekrutamentu hotu tenke la’o tuir regras, tanba governu anteriór hatama funsionáriu kazuais barak ne’ebé laiha akompanamentu husi servisu funsaun públika hodi kria problema ba sira nia govenasaun.
Hafoin hasoru malu ho Prezidente Republika Primeiru Ministro Xanana Gusmão dehan, profesor kontratadu sira ne’ebé kontinua ejiji sira nia direitu tanba ministeriu edukasaun hapara sira nia kontratatu ne’e iha ema balun ne’ebé apoiu sira husi kotuk, tanba atu tama ba iha kontratadu tenke tuir regras la’ós hatama de’it kazuais sira.
“Ami tama mai ne’e kazuais ne’e milares, iha hau nia gabinete ha’u husu sira imi mai halo saida ami la hatene halo buat ida bolu mai para atu sai funsionáriu, arsenio bano iha nia gabinete 428 ne’e mesak kazuais de’it atu bele mana eleisaun” dehan PM Xanana iha palásiu PR ai-tarak laran, (22/02).
Xanana Gusmão dehan tan katak, profesor sira ne’ebé dadaun ne’e konsentra iha resintu ministeriu edukasaun atu pasénsia hodi hein prosesu rekrutamentu ne’ebé dadaun ne’e la’o hela, nune’e bele hanoin ba objetivu ida ne’ebé bo’ot liu ba povu no nasaun, la’ós partido ida ukun bainhira remata ukun hatama nia ema iha administrasaun sira.
“Falta empregu ne’e ita la’ós hatama ema no joven hotu hotu ba funsionáriu polísia FDTL, se nune’e ita la presiza buat ida hatama hotu de’it, tanba ne’e ha’u husu ba professor sira hein, la’ós atu hatama de’it maibé tenke tuir regras” tenik Xanana.
Xefe Governo ne’e dehan, servisu funsaun públika nian tenke haree ba prosesu rekrutamentu ne’ebé la’o, funsaun públika labele nonok de’it kuandu ema hatama funsionáriu kazuais sira maibé presiza haree aplikasaun no regras rekrutamentu ba ema hotu hotu, nune’e mós hanesan nia promete ona katak iha marsu abril nia sei la’o tuir ministeriu ida-idak atu haree servisu hotu karik lao lalos mak tenke hasai.
“Ne’ebé regras tanba halo violasaun ba regras sira ne’e mak agora ami lakon tempu hamoos foer sira ne’e” hakotu PM Xanana.
