Ohin, 1 Marsu, Antonio da Conceição Kalohan hato’o ona pedidu ba Presidente Bankada Partidu Demokratiku (PD) iha Parlamentu Nasional, hodi husu fila hikas ba asumi nia knar nudar deputadu Parlamentu Nasional. No Rosena tenki hakiduk hikas hosi nia knar truka Kalohan nia fatin.
Karta ne’ebe Antonio Kalohan manda ba Presidente Bankada PD nian iha Parlamentu Nasional halekar tiha ona iha publik ohin. Karta ida ne’e esplika Kalohan hato’o nia pedidu no esplika mos razaun atu fila fali PN.
“Liu hosi biban ida ne’e hau informa katak hau desidi fila fali ba Parlamantu Nasional hodi halao hau nia knar nudar deputado VI Lejislatura period 2023 – 2028 iha loron 4 Marsu 2024”, karta pedidu ne’e haktuir.
Antonio mos esplika katak, “Razaun hau fila tanba misaun ne’ebe hau simu nudar embaixador hodi simu pose iha loron 12 fulan Dezembru 2023 la iha kontinuidade. Hau hetan ona exonerasaun hosi Exia. Presidente da Republica, tanba ne’e la iha inkompatibildidade atu hau ba exerse fali hau nia mandato nudar deputado.”
Antonio mos agradese Rosena Martins halao knar nudar deputada substitui Antonio Kalohan hosi 12 Dezembru 2023
Neon Metin konfirma ho deputada Rosena Martins ne’ebe substitui Antonio Kalohan no nia mos hatene duni kona ba ida ne’e.
“Haree ba regimento Parlamento Nasional nian, Kalohan iha dalan atu fila duni tanba nia mak titular, hau subtituisaun temporia deit. Kestaun seluk ne’e fila ba pessoal ida-idak nia karakter ou konsiensia moral ida-idak nian atu deside konaba nia desizaun nebe nia foti tanba antes ne’e Kalohan deklara ba publiku, nia mak iha responsabilidade ba hatan tanba sa mak nia hakarak fila fali ba PN”, deputada Rosena esplika via messenger.
Desizaun fila hikas ba PN ne’e halo tuir Rejimentu PN nian, nu.5, kona ba Substituisaun Temporaria.