Reportajen Filomena da Conceição
Komemorasaun loron veteranus nian ba dala-VII, Veterana Iría Monica Xavio ho kodigu “Bimare”, hateten, partisipasaun estudante no joven menus iha komemorasaun loron veteranus nian, tanba ne’e, nia husu estudante no joven sira tenke matenek, hodi partisipa iha loron istóriku Timor nian no la presiza hein konvite mak foin ba partisipa.
“Hau hare’e partisipasaun estudante sira nian menus teb-tebes, tanba ne’e nu’udar inan hanesan mós veterana ida, husu ba joven sira partisipa hodi hatene loron istóriku Timor nian, tanba ne’e, jerasaun foun tenke konxiente no partisipa no la presiza fó konvite,” dehan Veterana Bimare ba jornalista Neon Metin iha Centro Convenções de Dili (CCD), Domingu, 03/03.
Nia dehan nu’udar jerasaun foun, imi sente imi nia inan aman luta ba rai ida ne’e, la presiza konvite mak imi foin ba partisipa, maibe tenke hatutan nafatin inan aman sira nia luta.
Iha fatin Hanesan, Vice Ministru Asuntu da Combatentes Libertação Nacional (MACLN), Marito Reis, hateten, komemorasaun loron veteranus nian hanesan loron importante ba veteranu hotu, nune’e nia husu jerasaun foun sira tenke banati tuir nafatin luta nain no herois sira nia dalan, hodi lori futuru nasaun ba oin.
“Ohin loron 3 de Março hanesan loron ne’ebé ita komemora loron vereranus, ne’ebé atu fó hanoin mai ita katak oinsá atu hamutuk hodi la’o ba oin, tanba nee planu husi Ministério Asuntu Combatentes da Libertação Nacional (MCLN), ba futuru mak atu hamutuk ho povu doben sira hodi fahe inisiativa atu bele valoriza luta ida ne’e hodi bele banati tuir buat ne’ebé heroi sira husik heka mai ita,” esplika Marito.
Nune’e mós, nia husu ba joven sira atu bele organiza malu, hodi kria paz no unidade iha rai doben Timor-Leste, no kontinua valoriza heroi, no heroina sira nia luta ba libertasaun Nasional, hodi bele sai joven ne’ebé kualifidu lori Nasaun Timor-Leste ba futuru.
“Ami sei apelu ba joven sira liu-liu ba joven ne’ebé ita bolu jerasaun patriota, tanba sira tenke metin prinsípiu da luta, tanba sira nia aman mak funu, hodi luta ida ne’e bele hetan libertasaun Nasional, tanba ne’e jerasaun patriota sira tenke hamutuk”, dehan Marito Reis
Iha Komemorasaun loron veteranu ida ne’e, MCLAN enkontru ho Munisípiu hotu inklui RAEOA , atu fo hatene ba populasaun no veteranus hotu atu bele realiza iha idak-idak nia munisipiu.
“Populasaun sira lábele hein konvite, tanba ema hotu hatene katak loron 03 de Marco hanesan loron vereranus, tanba ne’e sé semte an katak nia veteranu nia tenke mai partisipa iha loron ida nee, no konvite ne’e ita tenke fó ba ema sira ne’ebé hela iha rai seluk labele halo na ema veteranu”, tenik nia.
Entretantu, Komemorasaun Loron Veteranus refere relaiza ba dala-VII no organiza husi Ministério Assunto Combatentes da Libertação Nacional (MACLN) , iha palácio do governo no hetan parsipasaun maximu husi membru Guverno, memburu parlamento, veteranus, Mártires, F-FDTL, PNTL no estudante universitáriu.
