Reportajen Silvino Freitas
Komunidade Tasi-Tolu uma kain 424 seida’uk hetan notifikasaun eskrita maibé simu fali notifikasaun verbál husi ekipa jestaun merkadu munisípiu Dili atu hamamuk fatin ba loron tolu nia laran, tanba hahú segunda feira hetan ona eviksaun, nune’e komunidade pronto ona atu koolabora hodi kontribui maibé laiha notifikasaun eskrita no halo ona indiminizasaun atu sira bele hamamuk fatin nune’e governu bele implementa sira nia programa.
Portavoz Zenito dos Santos dehan, iha loron 11 Jullu ekipa jestaun merkadu halo notifikasaun verbal ho karakter urjente ho tempu ne’ebé limitadu ba loron 3 atu hamamuk fatin iha area juridisaun aldeia 12 outubru tasi-tolu nian ne’ebé komunidade afetadu hamutuk uma-kain 424 tuir dadus ne’ebé MOP foti atu hamamuk fatin, nunee komunidade afetadu sira nee koko hodi halo konfirmasaun ho parte autoridade munisípiu Dili nian maibe laiha konesimentu ba notifikasaun verbal ne’ebé hasai husi jestaun merkadu munisípiu Dili.
“ami reafirma ami nia pozisaun hodi fundamenta ba sua eselensia PM Xanana Gusmao atu konfirma dadus ne’ebé foti ona husi MOP nia rezultadu too ona iha ne’ebé” dehan portavoz Zenito liuhusi komunikadu imprensa ne’ebé hala’o iha 12 outubru tasitolu, (13/07).
Nia dehan tan, to’o dadaun ne’e komunidade afetadu seida’uk simu notifikasaun ho eskrita, no tuir loloos iha notifikasaun ho eskrita ba durasaun loron 30 no prolonga tan ba loron 10, no sira mos seida’uk hatene responsavel ba notifikasaun refere, maski nunee komunidade afetadu nafatin ho kompremitidu atu koopera no kolabora ho governu atu sira bele hala’o nia programa governu nian liga ho dezenvolvimentu rai nian, tanba ne’e sira nafatin husu ba governu atu fo indiminizasaun ba sira nia uma nunee sira bele husik ona fatin ne’ebé afeta ba evikasaun.
“ami mos preokupa ho ami nia oan sira ne’ebé atu tuir ezame iha segunda feira semana nee, ami mos husu ba ministeriu edukasaun atu responsabiliza karik evikasaun nee akontese oinsa ho labarik sira nia estudu, tanba ekipa edukasaun nian mos hola parte hotu iha prosesu evikasaun ida nee” dehan Zenito.
Fatin hanesan komunidade Tereza Soares dehan, nia mos preokupa ho nia oan sira ne’ebé atu tuir ezame iha segurnda feira karik evikzaun nee mak akontese duni tuir notifikasaun verbal mak sira oan sira sei la tuir ezame, sira pronto ona atu koopera hodi sai husi fatin refere maibe oinsa ho sira nia oan ne’ebé atu tuir ezame, nunee presiza tetu antes hasai sira husi fatin refere.
“hela loron 2 nee tenke tetu didiak hasai ami nee atu ba hela loos ne’ebé, entaun pasensia ami dada lona iha kampu laran too ami hein ami nia oan sira ezame hotu mak ami sai husi ne’e, nasaun ida nee imi dehan liuliu mak labarik sira nia futuru maibe imi halo mate tiha labarik sira nia futuru karik segunda ba oin ami halai namkari halo nusa mak sira ezame” dehan Teresa iha komunikadu imprensa ne’ebé halao iha 12 Outubro Tasitolu.
Entretantu komunidade Julio David mos dehan, sira pronto ona atu koopera no kolabora ba programa governu nian, tanba atu halo dezenvolvimentu ba sira nasaun sira pronto ona atu kontribui, maibe husi parte governu tenke trata sira ho dignu tanba uma ne’ebé governu atu sobu nee laos difisil maibe ida atu konstroe foun nee mak difisil, tanba nee sira nafatin husu atu bele mai fo notifikasaun.
“notifikasaun nee ami hein too agora la mosu mai, ministeriu ida ne’ebé loos mak responsavel ba ida ne’e, ministeriu edukasaun MOP sira mai hotu foti dadus, orbairua jestaun merkadu mai fali dehan loron tolu ba imi atu hamamuk fatin, loron 3 nee atu hamamuk nee fasil la presiza eskavador ami sobu rasik mos fasil hela, ami atu harii fali uma nee mak difisil, atu harii uma nee lori tempu naruk hasai osan rasik no kosar-been” dehan Julio David.