Reportajen Juvinal Cabral dos Santos
Legalmente Ministeriu Edukasaun (ME) sei la fo karta notifikasaun ba eis professor kontratadu 2023, tanba lei la fo dalan no ministériu edukasaun la’ós hapara sira, maibé sira nia kontratu mak remata duni
Porta-voz Ministeriu Edukasaun, Filipe Rodrigues Perreira hateten, Karta notifikasaun ne’e sira ezizi ona, maibé Ministeriu Edukasaun (ME) iha mós nia pozisaun ligadu asuntu notifikasaun tanba bazeia ba dekretu lei 32 27 de Agustu kona-ba prosedimentu administrativu artigu 26 hatete katak, parte sira ne’ebé mak halo kontratasaun entre parte sira ne’e hatene di’ak ona kona-ba konteudu kontratu nia.
“Ligadu ho sira nia ezizensia ne’e sira nia kontratu ho Ministériu Juventude Desportu iha Abríl 2023, iha klauzula ida ne’ebá hatete katak notifikasaun ne’e halo bainhira kontratu ne’e moris hela, bainhira durasaun kontratu ne’e tinan ida maibé ministériu hakarak hapara iha dalan klaran entaun ministériu iha obrigasaun atu notifika sira durante 30 dias, nune’e fulan oin mai tan ne’e sira labele ona hanorin. Ne’ebé Ministériu sei la foti asaun ruma liga ho karta notifikasaun ba eis profesór kontratadu sira, tanba se Ministériu atu notifika sira públiku dehan ME mak hapara sira mais durante ne’e Ministériu la’ós hapara sira, maibé sira nia kontratu mak remata duni. Ne’ebé Ministériu sei la tama iha jogu ida hanesan ne’e, ne’ebé ita sei la fo karta notifikasaun ba sira.” Dehan porta-voz ME Filipe Rodrigues iha nia servisu fatin Villa Verde 09/07/2024.
Porta-voz haktuir depois de kontratu remata iha 31 Dezembru 2023, parte rua la iha ona obrigasaun jurídiku atu halo avaliasaun dezempeñu ba sira, tanba kontratu termina sira la’ós ona ajente administrasaun públiku Ministériu nia, entaun Ministériu la iha obrigasaun atu halo avaliasaun dezempeñu ba sira.
Ne’ebé husu ba eis profesór kontratadu sira atu ba tuir teste bolsa kandidatu ne’e, tanba dalan úniku atu sai profesór iha Timor-Leste mak liu husi teste bolsa kandidatu profesór. Tanba teste bolsa kandidatu ne’ebé dadaun la’o hela ne’e eis profesór kontratadu sira balun tuir no barak mak liu.
“Ministériu nia funsionamentu tomak la’o tuir regra sira ne’ebé estabelese ona iha ita nia rai, ne’ebé labele obriga Ministériu atu la’o sees husi regulamentu sira ne’ebé mak iha, tanba risku ne’e boot. Tanba lei taka dalan ma ka ita fó kontratu ne’e se mak atu responsável, halo pagamentu salariu ne’ebé la fasil ida.”
Iha fatin hanesan porta-voz eis professor kontratadu 2023 Agostinho Pinto dehan kontratu termu sertu ne’e kada periodu tenke renova, tenke haree professor kontratadu 2023 ne’e rekrutamentu liu hosi dekretu lei numeru 22, 2011 koalia kona ba konkursu para agente administrasaun publika
“Entaun iha artigo 45 ne’eba ne’e professor sira ne’e hein atu avaliasaun ba funsionariu publiku, se ita boot sira haree fila fali iha lei numeru 5/2009 15 de jullu koalia kona ba estatutu funsaun publika iha artigo 3 koalia kona-ba iha funsionariu permanente no funsionariu agente iha ne’eba so mate mak para.” Dehan porta-voz eis professor kontratadu ba jornalista sira iha resintu ME.
Nia hateten dala ida tan ba asesor haree didiak lei funsaun publika, professor sira ne’e rekrutamentu liu husi komisaun funsaun publika (KFP) bainhira tuir lei kuandu hapara funsionariu ida agente ida, iha ne’eba hateten katak tenke notifika iha lei estatutu funsaun publika artigo 80 para funsaun publika fo notifika ba professor sira ne’e komete krime saida ka sala saida.
Eis professor kontratadu 2023 sira hein desizaun husi ME mak la iha, asaun greve iha ministeriu edukasaun too iha 30 Setembro.
