Reportajen Joanina Casamiro
Sekretário Estado Comunicacão Sosial (SECOMS), halo intervensaun ba sala redasaun RTTL, EP hodi muda konteúdu notisía ho titulu “Primeiru Ministru lakohi kaer liman ho membru Governu wainhira Fila hikas husi Swiss to’o Dili”.Nune’e Conselho de Imprensa (CI) kondena maka’as asaun intervensaun ne’e tanba, kontra artigu 40 Konstituisaun RDTL pontu 2 ne’ebé dehan “Liberdade ko’alia no informasaun nian labele hetan limitasaun husi sensura ruma”.
Liuhusi Konferensia Imprensa, Prezidente Konsellu de Imprensa de Timor-Leste (CI), Otelo Ote , hateten, nu’udar entidade administrativa independente ne’ebé tutela ba-iha setór komunikassun sosial nian, define ona iha Lei Komunikasaun Sosial nu. 5/2014, loron 19 November, no Dekretu-Lei nu 25/2015, ho kna’ar atu asegura liberdade imprensa no liberdade espresaun.
“Ita hakat husi baze legal ne’e, KI nia ezisténsia hahú fulan Maiu tinan 2016 to’o agora ne’e kontinua asegura servisu jornalizmu no media inklui hamriik metin ba defende no asegura públiku nia direitu atu hetan notisia ne’ebé loos, no mos kualidade tuir lei komunikasaun sosial no regulamentu KI nian hanesan ita hotu hatene iha fulan hirak liu-ba, mosu notisia iha media bałun ne’ebé deskonfia intervensaun SECOMS nian iha redasaun RTTL, EP Liga ho notisia kona-ba Primeiru Ministru Xanana Gusmão ne’ebé la kaer liman ho membru Governu sira wainhira fila hosi Swiss, iha loron 23 Abril tinan ne’e,” dehan Prezidente CI, Otelo Ote, iha Salaun KI Kintal bo’ot, Segunda 05/24.
Nia haktuir bazeia ba informasaun ida ne’e maka Kl estabelese nia komisaun ida, hodi buka hatene loloos faktu kona-ba informasaun ne’e. Komisaun hahú nia servisu durante fulan Juñu no Jullu hodi buka informasaun direta husi entidade oi-oin inklui jornalista RTTL, EP. Liu hosi dadus ne’ebé hetan komisaun konklui ho faktus sira tuir mai;
“SECOMS ba duni iha sala redasaun RTTL, EP nian iha loron 23 Abril 2024 akompaña husi Prezidente Konsellu Administrasaun RTTL, EP. SEKoms rasik wainhira partisipa nu’udar orador iha “the DILI DIALOGUE FORUM” rekoñese katak ba duni sala redasaun RTTL, EP. Konfirma katak SEKoms halo duni intervensaun ba sala redasaun RTTL, EP nian hodi muda konteúdu notisia ho titulu Primeiru Ministeru Lakohi kaer liman ho membru Governu wainhira Fila hikas husi Swiss to’o Dili,” nia esplika.
Tanba ne’e KI lamenta atitude SECOMS nian, asaun ne’e bele kontribui ba hatún ranking liberdade Imprensa Timor-Leste nian iha tinan oin mai. Konsellu Imprensa husu ba SECOMS atu hapara intervensaun hanesan ba sala redasaun media hotu iha Timor-Leste iha futuru, hodi hametin no asegura liberdade imprensa no liberdade espresaun.
Nune’e mós KI enkoraja midia no redasaun hotu, atu hato’o informasaun ba Kl wainhira hetan intervensaun hosi sé de’it ba sala redasaun sira. Rezultadu levantamentu ne’e sei submete ba entidade hirak ne’ebé durante ne’e defende no promove liberdade imprensa hanesan Prezidente Repúblika. Parlamentu Nasional, PDHJ, Asosiasaun Jornalista sira no sosiedade sivil.
