Reportajen Silvino Freitas
Juridico Sosial Consultoria (JU,S) ne’ebé akompaña kazu asediu sexual ba estudante joven-feto husi Universidade da Paz (UNPAZ) konsidera kazu ne’ebé akontese ba joven-feto ne’e grave. Kazu ne’e hatudu imajen ne’ebé la di’ak tanba autór ba kazu ne’e hala’o hela serbisu hanesan funsionáriu iha tribunal. Kazu ne’e akontese iha nia serbisu fatin, maibé funsionáriu ne’e hala’o mós kna’ar hanesan dosente iha UNPAZ, no orienta hela estudante joven-feto ne’e nia monografia.
Olivio Afonso Barros Advogadu JU,S dehan, suspeitu ne’ebé halo asediu ba joven-feto ne’e hanesan dosente ba joven-feto ne’e no mos nudar autór judisiariu iha tribunal. Joven-feto estudante finalista ida iha UNPAZ. Oras ne’e dadaun estudante joven feto ne’e tama ona faze elaborasaun monografia. Dosente ne’e mak sai ninia dosente orientadór ba teze joven-feto nian. Faktus ne’ebé alegadu kazu ne’e la’ós akontese iha universidade maibé akontese fali iha edifísiu ka fatin serbisu judisiáriu husi dosente ne’e nian.
“Ami haree katak ida ne’e grave tebe-tebes ba imajen no integridade husi tribunal rasik, ne’e ita lamentavel no ne’e la devia atu akontese” dehan advogadu Olivio ba jornalista sira iha JU,S Motael, (02/08).
Advogadu ne’e esplika, medida ne’ebé atu foti ba prosesu refere maka husi joven feto ne’e hahú ona ho esforu lubuk ida. Joven feto ne’e hahú ona keixa ba universidade, no ministeriu públiku atu bele hetan justisa. Tuir kodigu penal asaun ne’e krime koasaun sexual. Husi parte JU,S seida’uk simu Informasaun husi universidade no fatin serbisu ne’ebé autor haknaar an ba. Seidauk mos hatene kona-ba sansaun disiplinar ba dosente refere.
“Faktu ne’ebé alega ne’e maka hanesan ohin ha’u dehan ona katak tuir kodigu penal bolu koasaun sexual. Ba fali iha relasaun serbisu ka sansaun disiplinar nian, hanesan funsionáriu hahalok ne’e bolu asediu sexual. Nune’e husi kazu ne’e ita hahú ona prosesu sira ba instituisaun atu bele hetan sansaun disiplinar,” dehan advogadu Olivio esplika liutan.
Nune’e JU,S mós hahú ona prosesu ba instituisaun ne’ebé nia hakna’ar an ba atu foti medidas disiplinar hasoru funsionáriu ne’ebé halo hahalok krime asediu sexual hasoru joven-feto ne’e.
Fokupers nia kampañe kontra Asediu Sexual esplika katak, “Kualkér hahalok ne’ebé halo ho natureza seksuál, tantu fíziku inklui book ka kaer ema nia isin lahó ema nia hakarak ka la ho lisensa, verbál hanesan komentáriu seksuál sira no hakfuik, presaun atu pasiar ka hala’o relasaun íntimu, hatudu ka haruka imajen seksuál, hatudu jestu seksuál tantu ho liman ka órgaun seksuál, publika/espalla vítima nia video ka imajen iha média lahó nia autorizasaun ne’ebé ofende dignidade ema ne’e nian.”
Abut husi Asédiu seksuál mak abuzu poder: asédiu seksuál la’os de’it kona-ba sexu, maibé kona-ba poder, agresaun no manipulasaun. Barak la ko’alia sai tanba relasaun poder ne’ebé la hanesan.
