Reportajen Umbelina dos Reis
Atu garante Eleisaun Parlamentár 2023 la’o ho pasifika no partisipativu, Comissão Nasionál das Eleições (CNE) realiza Workshop nasionál ho tema “Hametin Forsa Servisu ba Eleisaun Parlamentár 2023”, hodi hare estratéjia ba garante eleisaun ho imparsialidade, independénsia, transparénsia ho responsabilidade.
Nune’e Prezidente CNE, José Belo liu hosi nia diskursu ba semináriu nasionál refere, nia husu ba funsionáriu CNE ho STAE tenke servisu ho imparsialidade no responsabilidade durante eleisaun.
“Objetivu hosi eventu ne’e halo konsolidasaun ba komisáriu no estrutura nasionál no munisipál hodi halo preparasaun ho di’ak, nune’e CNE nu’udar órgaun eleitorál tenki halo preparasaun ho di’ak, hodi nune’e timoroan tuir eleisaun ho di’ak no susesu,” dehan Prezidente CNE, iha Salaun Apuramentu Nasionál CNE, 06/02.
Nia informa, da-dauk ne’e sira haree hela ba pontuasaun sentru votasaun nian, oinsá servisu ho partidu polítiku sira hodi eleva partisipasaun sidadaun nian, faktu ne’ebé la efetivu entaun modelu sira hanesan ne’e presija halo mudansa, tanba ne’e CNE servisu hamutuk ho igreja no parte relevante sira hodi halo orasaun antes tama ba eleisaun parlamentár.
Alein de ne’e mós nia dehan, CNE ho STAE servisu hamutuk, hodi prepara aumenta sentru votasaun iha rai laran no rai li’ur, sé aumenta iha rai laran rekrutamentu ne’ebé la’o sei prevé orsamentu, maibé orsamentu prevé hotu ona. Nia dehan, agora hein hosi STAE nia aprezentasaun, tanba parte hosi CNE halo diskusaun kle’an no preparadu ona ba eleisaun nian.
Opsaun sira ne’e foti tanba haree ba pasadu ema la partisipa maximu, tan ne’e prepara sentru votasaun iha rai li’ur nune’e akumula joven sira ne’ebé servisu iha ne’ebá hodi vota. “Tanba eleisaun la’os obrigatóriu entaun aproximasaun servisu ne’ebé besik, atendimentu tenki di’ak hodi nune’e partisipasaun eleisaun tenki di’ak no susesu to’o rohan.”
Nia informa katak fatin sentru votasaun uluk iha de’it 1200 estasaun ba votasaun, maibé agora halo estimasaun bele sa’e ba 1500 depende hosi STAE informa ba sira.
