Home Notisia SEJD-Japaun Ko’alia Kooperasaun Ba Dezenvolvimentu Área Juventude, Desportu no Edukasaun Fízika

SEJD-Japaun Ko’alia Kooperasaun Ba Dezenvolvimentu Área Juventude, Desportu no Edukasaun Fízika

283
0
SEJD ho Embaixador Japaun iha enkontru. [Foto: Adroaldo | 18.01.2023]

Reportajen Adroaldo “Saretukau”

Sekretária de Estadu Juventude no Desportu (SEJD), Kuarta-feira ne’e (18/01) hetan vizita kortezia hosi Embaixador Japaun iha Timor-Leste hodi ko’alia konabá koperasaun sira ba dezenvolvimentu área juventude no desportu, iha Timor-Leste.

Hafoin sorumutu, Embaixador Japaun iha Timor-Leste, Tetsuya Kimura, hatete, nia vizita SEJD nu’udar vizita kortezia nomos fahe opiniaun konabá oinsá atu dezenvolve sira nia koperasaun iha área juventude no desportu. Iha oportunidade ida ne’e, Embaixador Kimura fahe mos nia esperiénsia nu’udar Diretor Jeral Desportu nian iha Japaun, konabá oinsá atu dezenvolve desportu ne’e rasik.

“Iha oportunidade ida ne’e mos, ha’u fahe hanoin ho Sua exelénsia konabá lala’ok desportu nian, liu-liu oinsá desportu ni-nia papel atu halo ema sai respeita malu liu tan hosi prátika iha desportu ida ne’e. Iha oportunidade ida ne’e mos, ami halo diskusaun ida ne’ebé make kle’an hodi fahe hanoin ba malu, oinsá para ami bele dezenvolve liutan área oi-oin iha desportu nian no área juventude nian,” dehan Embaixador Japaun hafoin sorumutu ho Sekretária Estadu SEJD, iha Salaun Magna SEJD.

Nia hatutan, hafoin fahe hanoin balu ho Sekretária Estadu konabá dezenvolvimentu desportu iha Japaun, iha tinan ida ne’e sira sei haruka voluntáriu na’in 7 hosi Japan Overseas Cooperation Volunteers (JOCV) iha fulan Marsu mai Timor-Leste no sei aloka sira ba eskola ensinu báziku no universidade hodi ajuda dezenvolve edukasaun fízika iha Timor-Leste.

Iha parte sorin, Sekretária Estadu SEJD, Abrão Saldanha, hatete, sorumutu ho Embaixador Japaun ne’e, ko’alia oi-toan ho Embaixador ba dezenvolvimentu área desportu iha Japaun tanba Embaixador rasik iha esperiénsia servisu iha ajénsia desportu Japaun nian.

“Nia hanoin katak, hakarak esplora desportu hanesan forma de diplomásia ida, Timor-Leste ho Japaun iha, entaun ami diskuti oi-tuan, esperiénsia sira nian oinsá atu fahe ho ita, liu-liu iha aktividade fízika, edukasaun fízika no desportu rasik.” dehan Abrao

Sekretária Estadu Abrão hatutan, tinan ida ne’e rasik, sira sei haruka voluntáriu sira iha área edukasaun fízika no desportu nian ba iha eskola sira no universidade, sira mai oinsá atu ajuda, promove aktividade fízika ho edukasaun fízika iha eskola públiku no provadu iha Díli laran no inklui universidade iha Departamentu Edukasaun Fízika no Desportu rasik.

Print Friendly, PDF & Email

LEAVE A REPLY

Please enter your comment!
Please enter your name here