Reportajen Cresencia & Zemila
Komunidade Ex-Asrama Brimob Comoro ohin (31 Jullu) halo konferensia imprensa, iha Ex-Asrama Brimob, hodi kondena aktu levantamentu dadus forsadu halo hosi Ekipa Interministerial nebe mai akompana ho membru polisia lori ho kilat. Aproximasaun uza forsa ne’e halo tau komunidade no mos labarik sira.
Porta Voz Januario Amaral de Jesus la simu no lamenta ho maneira Ekipa Ministerial ho membru polisia sira nian ba halo levantamentu dadus. Tan komunidade sira hela tinan 25 ona iha fatin ne’e.
“Ami komunidade lamenta ho attitude nai ulun sira ho seguransa PNTL nian I ekipa interministerial ne’ebé mak halao levantamentu dados ne’e. Ami kondena assaun sira ne’ebé mak mensiona iha leten; Ministerio inerior la iha vontade e la respeita ezizensia komunidade ne’ebé mak husu atu halo dialogo ho komuidade nian nu’udar sidadaun iha rai ida ne’e comissario PNTL lakon ona sentiment humano ba nia maluk Timor oan, tamba la iha estudo Viavilidade antes foti desizaun hodi mai hadau rai hela fatin Ex- Asrama Brimob ida ne’e”, Portavos Januario expresa.
Antes ne’e komunidade hato’o karta pedido ba Ministerio Interior no Komisariu PNTL atu marka tempo hodi bele halo dialogo ho komunidade antes realize planu levantamentu dadus maibe karta refere la hetan resposta husi nai ulun sira.
Xefe Suco Comoro, José da Silva Eligio Marcal, mos informa katak iha enkontru nebe organiza hosi Intituisaun Polisia nian hamutuk ho Ministeriu Obras no Terras Propriedades koalia duni kona ba fatin sira ne’ebe polisia Indonesia nian husik hela, inklui Ex-Brimob Comoro ne’e. Maibe Xefe hatete katak Ex-Brimob ne’e sei tinan oin mak hamamuk.
“Ami iha iha enkontru ne’eba sira deside dehan katak sei haree ka bok uluk mak fatin hanesan Vila-verde, Kaikoli no Motael maibe Komoro ne’e sedauk ida hein ba tinan oin”, Xefe Suco Jose hato’o ba Neon Metin, semana ida liuba iha Sede Suco Comoro.
Maibe Xefe Suco mos hakfodak tanba enkontru foin liu loron hirak deit komandante polisia ida mak kedas Sede Suco Comoro no hato’o ba Xefe Suco Jose katak atu halo sosializasaun. Maski ikus mai Xefe Suco aseita ho data nebe propoin hosi komandante polisia ne’e, ba 25 Jullu, maibe Xefe Suco husu atu mud aba 30 Jullu. No Xefe Suco mos propoin antes halo levantamentu halo uluk lai dialogu ho komunidade atu rona komunidade nia preokupasaun.
“Iha Ex-Brimob ne’e iha uma kain 100 resin ne’ebé mak hela iha ne’ebá. Se sira sai karik ba ne’ebé ho situasaun ida agora ne’e? Oinsa ho sira ne’ebe servisu? Eskola? balu universidade, serake sira sai be nee hetan fatin iha dili ne’e hodi sira hela ka lae? tamba ida ne’e mak komunidade sira presiza dailogo. Tamba 99 sira mai hela iha agora nee halo 25 anos”, Xefe Suco esplika liutan.
Informasaun kona ba atu husik hela fatin ne’ebe komunidade sira iha Ex-Brimob nunka rona antes ne’e. Uma no rai ne’ebe komunidade sira hela ba hetan sukat tiha ona hosi Terras no Prpriedade iha tinan 2015 liuba.
“Ami durante ne’e la rona informasaun kona-bá atu halo eviksaun, derepente de’it iha dia 20 Jullu ne’e mak sefi suku fó avizu katak hotu-hotu tenki ba iha uma laku para atu rona informasaun kona-bá Asrama Brimob atu sobu atu estadu hari fali Kazerna Polisia ninian ho Aramazen,” Membro komunidade Ex-Brimob, Aldeia 4 de setembro Lucresia da costa Guteres silva informa.
Hanesan mos ho Lucresia membru komunidade sira seluk mos sente triste ho aktu governo nian ne’e. Sira hela kleur ona iha fatin ne’e, sira oan sira mos eskola besik iha sira nia area hela fatin. Komunidade la satisfas no sente triste ho asaun ne’ebé mak sira halo ona, tamba hahalok ne’ebé mak sira halo hanesan fó presaun.
“Ami senti triste tamba hela iha ne’e ho tempo ne’ebé mak naruk tebes, ami sira ne’ebé eskola balun servisu, wainhira ami simu informasaun atu gusur ne’e ate ami balu matan been monu ba rai, tamba ami lahatene atu ba los ne’ebé, ami senti katak ami balun hakarak ka lakoi tenki fila ba foho, ami ne’ebé estudante hanesan tur banko iha universidade, ami hakarak ka lakoi ami tenki buka kost ka hela ho familia, ida ne’e ba ami todan tebes, tamba ami sente sei hasoru ambiente foun no sei diferente hanesan uluk”, membru komunidade Monalisa Marchal expresa nia tristeza.
Tuir planu IX Governo nian, Ministerio Interior nia planu, ba futuru atu konstrui kazerna ba official superior no armagen ba PNTL iha area Ex-Asrama Brimob ne’ebé lokaliza iha aldeia 4 de setembro Suco Komoro Kampung Baru.
