Home Notisia Governu Inisia Sondajen, Ba Programa Re-ajustamentu Planu Estratéjiku Dezenvolvimentu

Governu Inisia Sondajen, Ba Programa Re-ajustamentu Planu Estratéjiku Dezenvolvimentu

131
0
VPM-MPO, Enjeñeiro José Maria dos Reis hasai foto hamutuk ho Arcebispo Arquidiocese Dili, Dom Virgílio do Carmo da Silva, SDB ho ekipa. [Foto: Doc. VPM | 24.11.2021]

Reportajen Zevonia Vieira

VIII Governu Konstitusionál inisia prosesu konsulta ba re-ajustamentu Planu Estratéjiku Dezenvolvimentu (PED) 2011-2030.

Liuhusi komunikadu ne’ebe Neon Metin asesu, iha loron 23 Novembru,  Vise-Primeiru Ministru no Ministru Planu no Ordenamentu (VPM-MPO), Enjeñeiro José Maria dos Reis, nu’udar Koordenadór ba prosesu reajustamentu PED 2011-2030, halo-ona reuniaun konsultasaun ho Arcebispo Arquidiocese Dili, Dom Virgílio do Carmo da Silva, SDB no Bispo Diocese Maliana, Dom Norberto do Amaral,

Iha fulan ne’e nia laran, ekipa enumeradór hamutuk ema nain 46 destaka ona ba suku hamutuk 138 iha territóriu nasionál hodi hala’o sondajen “Aspirasaun Timor-oan ba Futuru.” Objetivu husi sondajen ne’e mak atu rekolla populasaun Timor-Leste sira nia hanoin kona-ba dezafiu ne’ebe sira hasoru no sira-nia aspirasaun ba futuru Timor-Leste ne’ebé sira hakarak iha tinan 15 oin mai. Sondajen ida ne’e realiza liu husi kolaborasaun entre Centro Planeamento Integrado (CPI) husi Ministériu Planu no Ordenamentu (MPO); Unidade Planeamentu, Monitorizaun, no Avaliasaun (UPMA) husi Gabinete Primeiru Ministru; Diresaun-Jerál Estatístika iha Ministériu Finansas; no Ministériu Administrasaun Estatál.

Aleinde sondajen ne’ebé hala’o dadauk hela, ekipa téknika sei halo mós konsulta ho líder eis-titulares, líder konfisoens relijiozu sira, no reprezentante husi entidade, instituisaun no komunidade hotu, inklui sosiedade sivíl, setór privadu, akademia, partidu polítiku, média, autoridade munisipál no líder komunitáriu, líder grupu juventude, grupu feto, no grupu vulnerável no marjinalizadu sira.

Objetivu husi konsulta públiku ba reajustamentu PED ne’e hala’o hodi asegura katak dokumentu planu estratéjiku nasionál ba tinan 15 oin mai ne’e refleta mehi Populasaun Timor-Leste hotu nian, atu nune’e asegura inkluzaun no la husik hela ema ida iha kotuk iha dezenvolvimentu. Aleinde ida ne’e, konsultasaun ho entidade hotu inklui partidu polítiku sira ne’e atu garante katak planu estratéjiku nasionál ne’e sai hanesan instrumentu ba koezaun nasionál no estabilidade governativa, hodi garante kontinuidade iha esforsu ba dezenvolvimentu nasaun ne’ebe justu, sustentável, no bele mellora ben-estár povu tomak nian.

Desizaun VIII Governu Konstitusionál liu husi Rezolusaun Nú. 81/2021 – 21 Jullu ba establesimentu Komisaun Interministeriál ba Reajustamentu PED 2011-2030 ne’e bazeia ba situasaun atuál Timor-Leste nian ne’ebé kontinua depende ba fundu mina-rai, no mos ho

problema kiak no dezigualidade multidimensionál ne’ebé Timor-Leste hasoru antes ona no magnifika liu tán ho impaktu husi pandemia COVID-19 no dezastre naturál sira. Konsidera situasaun atual ne’e, mak reajustamentu PED opta konseitu dezenvolvimentu sustentável ne’ebé konsagra ona iha konstituisaun RDTL no aliña mós ho Objetivu Dezenvolvimentu Sustentável (ODS). Nune’e, reajustamentu PED sei garante vizaun komún ida ba futuru Timor-Leste tuir aspirasaun Populasaun Timor-Leste hotu nian ho medida estratéjiku prazu médiu no naruk nian ne’ebé integradu no iha balansu diak entre dimensaun tolu husi dezenvolvimentu sustentável: sosiál, ekonómiku, no ambientál.

Konseitu dezenvolvimentu ida ne’e nia sentru mak ema, natureza, no dame, tuir kontextu Timor-Leste nian, no bazeia ba prinsípiu direitus umanus garante inkluzaun hodi la husik ema ida iha kotuk, no sei bazeia mós ba evidénsia, potensialidade territoriál, no rasionalizasaun kustu-benefísiu. Aleinde ne’e, konseitu dezenvolvimentu ne’e orientadu ba atinjimentu vizaun no metas previstu iha setór prinsipál sira, inklui sub-sektorál no programa sira, atu garante planu estratéjiku prazu médiu no naruk ida ne’ebé integradu nu’udar matadalan ba dezenvolvimentu sustentável, konta ho progresu sira ne’ebé Timor-Leste atinji ona.

Nune’e, reajustamentu PED sei foti lisaun sira husi implementasaun Planu Dezenvolvimentu Nasionál (PDN 2002-2020), Planu Estratéjiku Dezenvolvimentu (PED 2011-2030) ne’e rasik, Planu Rekuperasaun Ekonómika, Relatóriu CVAR no CVA, no estratejia sektorál sira seluk hodi defini medida estratéjiku hirak ne’ebé própriu ba responde situasaun atuál no antesipa risku no ameasa sira ne’ebé bele mosu iha futuru.

Print Friendly, PDF & Email

LEAVE A REPLY

Please enter your comment!
Please enter your name here