Reportajen David da Costa
Povu Timor-Leste iha fatin oioin hato’o sentimentu tristeza no respeitu ba partida Lu-Olo, lider nasionál ida ne’ebé durante ne’e dedika nia moris ba luta libertasaun no servisu ba nasaun. Povu Timor sira konsidera mate lider ne’e hanesan lakon boot ba Timor-Leste, tanba nia kontribuisaun iha tempu luta, independénsia no durante nia lideransa ba rai.
Luís Urbano Varella Tilman hanesan sidadaun Timor oan ida, espresa ninia sentimentu Bainhira rona katak, povu Timor-Leste sente lakon boot eis Prezidente Republika no Prezidente partudu FRETILIN ne’ebe hakotu moris, lider ida ne’ebé durante ne’e dedika nia moris tomak ba servisu nasaun no povu.
Tuir nia, lideransa ne’ebé husik hela ona Timor-Leste sempre iha kompromisu atu lori povu ba moris ida ne’ebé di’ak no dignu. Nia hanorin katak Timor oan sira tenke hamutuk no servisu ba nasaun ho unidade no responsabilidade.
“Hanesan Timor oan, ita lakon lideransa ida ne’ebé di’ak, lideransa ida ne’ebé ho nia fuan no laran sempre ko’alia kona-ba oinsá atu lori povu ba moris ne’ebé di’ak,” dehan Luís Urbano Varella Tilman ba Neon Metin, iha Jardin Bebora, Dili, Segunda 22/06.
Nia mos salienta katak durante nia lideransa, nia sempre bolu Timor oan sira atu hamutuk no servisu ba nasaun ho dignidade. Tuir nia, aman sira ne’ebé luta ba independénsia fó ona sira nia moris no sakrifísiu tomak ba rai ne’e atu povu bele hetan liberdade.
Maske aman Lu-Olo husik ona mundu ne’e, Tilman konsidera katak kontribuisaun sira ne’ebé nia halo ba Timor-Leste sei hela nafatin iha istória nasaun nian. Durante tempu okupasaun indonézia to’o períodu independénsia no bainhira assume kargu prezidensiál, nia kontinua servisu ba povu no nasaun ho dignidade.
Tilman lembra liafuan ida hosi lider ne’e, ne’ebé tuir nia sai hanesan mensajen importante ba jerasaun sira tuirmai: “Ita ukun rai ida ne’e, ita ukun povu ho dignidade no ukun ho didiak.”
Nia hato’o sentidu tristeza no respeitu ba lider ne’ebé tuir nia sempre servisu ho laran moos ba Timor-Leste no povu tomak.
Miranda Magno Soares, hanesan negosinate ambulanete hateten, nia rona notísia kona-ba mate Lu-Olo iha kalan bainhira nia hela fa’an sasán iha tasi ibun. Nia dehan sente triste tebes tanba Timor-Leste lakon ona lider ida ne’ebé povu rasik hili atu lori no servisu ba rai.
“Ha’u sente triste tanba ita-nia hun mate ona. Sira sa’e ba ukun tanba povu mak deside atu sira lidera no serví rai ida-ne’e,” dehan Miranda.
Nia mos husu ba povu tomak atu hamutuk hodi haloot no respeita mate isin lider ne’ebé uluk fó an ba luta libertasaun, hodi povu Timor-Leste bele ukun an rasik.
Negosiante ambulante, Marcolina da Silva mos espresa ninia sentimentu triste bainhira rona katak Lu-Olo mate iha Malázia. Nia konsidera Lu-Olo nu’udar lider nasionál ida ne’ebé fó kontribuisaun boot iha luta libertasaun.
“Ha’u koñese Lu-Olo tanba husi sira-nia luta mak ohin loron ita bele ukun an no goza liberdade,” dehan Marcolina.
Iha parte seluk, Samuel Perreira nu’udar joven ida mos hato’o nia tristeza tanba Timor-Leste lakon lideransa boot ida. Nia hatete katak sakrifísiu veteranu no lider sira iha tempu luta mak sai baze ba liberdade ne’ebé povu Timor-Leste hetan ohin loron.
Mate lider nasionál ida ne’e halo povu ka komunidade iha fatin oioin hato’o sentimentu laran triste no agradese ba kontribuisaun sira ne’ebé nia halo ba rai no ba povu Timor-Leste.
Enterantu, eis Prezidente Repúblika Demokrátika Timor-Leste (RDTL), no Prezidente FRETILIN Dr. Francisco Guterres Lú Olo, hakotu iis iha Ospitál Prince Court, Kuala Lumpur, Malázia, hafoin hetan tratamentu saúde intensivu. Ninia partida konsidera nu’udar lakon boot ba família, FRETILIN no povu Timoroan tomak.
