Home Notisia Laen Moris Ho Defisiénsia, Romana: Haksolok Bele Hetan Uma Gratuita Husi Governu

Laen Moris Ho Defisiénsia, Romana: Haksolok Bele Hetan Uma Gratuita Husi Governu

933
0
Romana Hamutuk ho nia oan sira, hamrik iha uma oin ne'ebe governu konstrui hela. iha Vemasi. [Foto: Joselina | 24.11.2021]

Reportajen Joselina dos Santos

Benefisiária kbiit la’ek Aldeia Uai-Dau, Suku Loi-Lubo, Postu-Administrativu Vemasi, Munisipiu Baucau Romana da Costa espera nia sentimentu haksolok tanba governu bele hadia nia uma liuhusi programa Uma Kbiit Laek.

Ba Neon Metin Romana hateten haksolok ba programa governu nian, ne’ebe bele oferese uma gratuita ba sira. durante ne’e nia ho nia família labele halo uma di’ak, tanba nia laen ho kondisaun Defisiensia fiziku ne’ebé forsa la to’o atu halo uma.

“Nu’udar benefisiáriu ida, ha’u sente kontente tebes,  tanba liu husi programa Uma Kbi’it Laek ne’e bele ona hasai ami husi sofrementu todan ne’ebe durante ne’e ami hasoru, liu-liu ba iha kondisaun uma nian maske foin 90%”, hateten Benefisiaria Romana iha Aldeia Uai-Dau, Suku Loi-Lubo, Postu-Administrativu Vemase Munisipiu Baucau, Domingu ne’e 21/2021.

Romana rekomenda  ba ukun nain sira katak komunidade barak mak sei halerik ba sira nia moris iha tempu Ukun Rasik-aan ida ne’e. Tanba ne’e husu atu labele to’o de’it iha ne’e, maibe tenke kontinua programa UKL ne’e hodi ema hotu bele sente mos hanesan  sai benefisiariu ba Faze dahuluk nian.

Iha Sorin Seluk Xefe Aldeia Uai-Dau, Virgílio Manuel da Costa hateten ba Neon Metin katak, Uma kbi’it Laek ne’e programa governu nian no mos liu husi Planu Nasionál Dezenvolvimentu Suku (PNDS), mak hafoin Suku iha kompeténsia, hodi bele ezekuta ba uma kbi’it laek ne’e. Nu’udar autoridade lokál tenke identifika ema ne’ebé mak laiha kbiit duni  atu halo uma.

“Ami haree tiha sira nia uma no halo verifikasaun ba iha fatin ne’ebe atu ezekuta  konstrusaun uma ne’e katak rai ne’e ninia rasik ka ema seluk nian bazeia ba tuir bu’at ne’ebe uluk ami estabelese tuir komisaun ida  atu bele justifika sira nian rain. Nune’e mos sira nian rai ne’e,  iha plantasaun ne’ebe ema hotu sai testamuña rai ne’e atu bele konstrusaun uma ne’e ba iha nia rai rasik,” Dehan Xefe Aldeia.

Autoridade ne’e hatutan, Uma Kbiit Laek ne’e bazeia ba data ne’ebe sira estabelese to’o durasaun fulan 3, data hahú ba uma kbi’it laek husi loron 26 Jullu no remata iha 26 Outubru, maibe data ne’ebe ezekuta ne’e liu tiha ona, tanba material sira mak tarde no dala ruma mos badaen sira atravesa ho bu’at ruma nune’e sira tarde uituan atu halo uma ne’e.

“Ita halo balansu ba uma ne’e, 50% liu tiha ona tanba iha faze primeiru ne’e pagamentus ba Badaen sira ne’e simu ona 50%. Orsamentu ne’e por volta $ 52.000 ba uma 3, kada uma ida hetan $ 17.000,” dehan Xefe Aldeia

Nia hato’o agradese tanba Timor-Leste pela primeira Vez aprova no sujere ba uma nain sira kuidadu didiak uma ne’ebe governu oferese atu bele dura to’o tina 20 ba leten.

Autoridade ne’e rekomenda tan ba governu karik bele tinan oin bele aumenta tan programa uma ba kbi’it laek, atu nune’e komunidade sira ne’ebe seidauk hetan bele iha oportunidade hanesan.

Print Friendly, PDF & Email

LEAVE A REPLY

Please enter your comment!
Please enter your name here