Home Feature Inundasaun Dili, Epifania Moris ho nia Oan Sira Iha Centro Evakuasaun La...

Inundasaun Dili, Epifania Moris ho nia Oan Sira Iha Centro Evakuasaun La Sente Seguru

323
0
centro evakuasaun Joao Paulo. [Foto: Zevonia Vieira | 08.04.2021]

Reportazen Zevonia Vieira

Teki-teki ema hakilar, tauk no buka tulun hodi salva an, udan no anin boot la para, kontinua fo ameasa ba ema sira iha Dili laran, ahi ne’ebe mate, halo ema barak halai iha nakukun laran.

Inundasaun ne’ebe akontese afeta ba ema nia moris, hamosu duni problema boot, ema barak lakon uma, lakon sasan no ema nia vida. Dezastre la hare ba ema boot ka kiik, ema hotu afeta ba hahalok natureza nian.

Iha centro evakuasaun Joao Paulo Tasi Tolu labarik sira halai bam ai, duni malu no hamnasa, sira la sente akontesementu ne’ebe sira hasoru, maske nune’e sira nafatin sai vitima tanba tenke husik uma, toba iha udan been laran, malirin, toba iha rai no susar atu han hahan hanesan iha uma.

Epifania Gomes kous hela nia bebe fulan 7, hakat hela eskada iha Joao Paulo Tasi Tolu nudar centro evakuasaun ba sira atu salva sira nia moris. Nia kontinua halibur nia oan, atu labele tanis, karik bebe ne’e tanis tan hamrok? Karik tan dukur maibe fatin la dun diak ba nia atu toba? Hanoin sira ne’e mosu iha hau nia ulun, atu hakbesik ba hodi hatene tuir.

Ho hamnasa kiik nia hase mai hau, no dehan bebe toba la dukur karik tanba sedauk haris, “hau fo ona susu inan maibe nia sei tanis”.

Karik los loron tomak ita nia isin la kona bee ka la haris, ita sente isin sira belit hotu, sa tan bebe. Hau komesa dada lia ho nia

Momentu udan boot halo hau trauma, bee mos sae derepente, entaun ami mos hakfodak, pois ho oan barak, bee mai la para, entaun ami mos hakfodak hodi halai sai, ami bolu malu ho vijinhu sira no  halai mai iha ne’e ho bebe, ami halai sae mai Joao Paulo, tanba bee kontinua sae ba bebeik. Bee ne’e sae to’o hirus matan no bee tama ba uma laran.

Hau nia oan nain 5 no ida ikun foin fulan 7, udan komesa iha tuku 2:00 madrugada, alin sira telefone mai dehan lalais bee sae, hau hakfodak hare bee mos nakonu ona, pois vinjinhu sira balun labele salva sasan tanba bee sae makaas los, entaun ami halai deit ona, sira lori deit isin lolon ho ropa tahan ida deit.

Agora dadauk ami iha fatin evakuasaun ne’e mak ami falta bee atu haris, no toba iha liur nakloke deit. Bee moos atu iha tanba hetan ajuda hosi UNDP no Cruz Vermelha. Hosi parte governu nian lori hahan no biscuit sira mai fahe ba labarik sira. Ami presiza los mak beeba haris, ropa no manta ba labarik sira.

Iha fatin evakuasaun hau toba la dukur tanba tenke tau matan mos ba labarik sira, sei kahur ho tauk keta halo udan boot mai tan. Hanesan inan sente la dun seguru, tanba toba iha fatin nakloken sempre hanoin buat oin-oin.

“Hau presiza tulun hanesan aimoruk hanesan aimoruk isin manas no kabun moras nian, no fatin ne’ebe seguru ba feto no labarik sira atu toba. Tanba dezastre ne’ebe akontese feto, labarik ho bebe sira mak sofre liu”,  dehan Epifania iha centro evakuasaun Joao Paulo, 05/04

Situasaun ne’e mak Epifania hasoru ho nia nain 5, dezastre naturais ne’ebe akontese, hamosu risku boot nia vida no oan sira, natureza la hare ba ema boot ka kiik, kiak ka riku, nia mai ho nia ritmu ne’ebe rezulta situasaun at barak iha komunidade nia leet.

Print Friendly, PDF & Email

LEAVE A REPLY

Please enter your comment!
Please enter your name here