Reportajen Filomena da Conceição
Fundasaun Média Development Center (FMDC), fasílita formasaun ba Jornalista sira husi rádiu komunidade, média online, estudante komunikasaun sosial UNTL ho UNITAL nomós organizasaun sosiedade silvil, oinsá atu halo reportajen sensível jéneru no violasaun hasoru feto ho labarik sira.
Diretór Fundasaun Média Development Center (FMDC), Frasisco da Silva Gary hateten, Objetivu husi Formasaun ida ne’e, óinsa atu eleva ka kapasita formandu sira, atu hakerek notísia kona-ba Sensível Jéneru no atu fahe esperiensia ba formandu sira, atu hakerek notísia di’ak iha sira-nia média ida-idak ne’ebé sira haknar-aan bá.
“Ami loke formasaun ne’e ho objetivu ida katak, atu fasilita partisipante sira oinsá atu hakerek notísia di’ak relasiona ho Sensível Jéneru iha sira-nia média ida-idak “ dehan Francisco da Silva gary ba Neon Metin iha Rádio Liberdade, Hudi laran, Kuarta 19/07.
Nia hatuir, formasaun ida ne’e ba grupu ikus nian, no grupu tolu mak tuir tiha ona formasaun kona-ba Sensível Jéneru ne’e. No formasaun ne’e realiza, tanba FMDC servisu hamutuk ho UN WOMEN no hetan suporta husi KOICA. Nune’e mós formasaun refere sei loke tan fali kompetisaun ba partisipasipante sira hotu, formandu sira ne’ebé hakerek notísia di’ak relasiona ho sensível Jéneru, FMDC sei sosa sira nia notísia.
Iha fatin hanesan, formandu Nelsiana Soares, hateten, sente orgullu banhira hetan oportunidade atu tuir formasaun ne’e, tanba dala- barak kazu Sensisível Jéneru ka violasaun hasoru feto no labarik ne’e akontese beibeik iha sosiedade, maibé dala barak ema la tau atensaun sériu ba problema hirak ne’e, nune’e feto sira kontinua sai vulneravel iha sosiedade nia let.
“Hanesan estudante komunikasaun sosial ne’ebé kandidatu ba futuru Jornalismu, ha’u sente orgullu bainhira hetan oportunidade hodi tuir formsaun ne’e, tanba liuhusi formasaun bele fasilita ha’u oinsá atu halo reportajen ba assuntu bazeia ba Jéneru no violasaun hasoru feto no labarik, tanba ita hare’e faktus sira ne’e akontese beibeik iha sosiedade nia le’et, maibé seidauk iha atensaun sériu ba problema sira ne’e hodi difikulta feto maluk barak mak kontinua sai vuneravel iha sosiedade nia matan,” dehan formada Nelsiana Soares
Nia hatutan, liuhusi formasaun ne’e bele ajuda nia hodi aumenta nia konesimetu iha área jornalismu atu nune’e, ba futuru sai hanesan bukae ida ba nia hodi hala’o prátika iha mundu jornalismu.
Entretantu, formasaun ne’e, fahe ba grupu haat no kada grupu ema na’in 38 no total formandus 152, formasaun ba kada grupu ne’e la’o durante loron 5 no formadus sira mai husi Jornalista rádiu komunidade, jornalista média online, organizasaun sosiedade silvil, estudante komunikasaun sosial husi Universida Nasional Timor Lorosa’e (UNTL) no Universidade Oriental Timor Lorosa’e (UNITAL).
