Reportajen Joselina dos Santos
Atu prevene kazu Asediu Sexual iha Universidade Nasional Timor Lorosa’e (UNTL), liuhosi Asesora Gabinete Vise-Reitóra ba Asuntus estudante UNTL, husu ba estudante sira labele tauk hodi hato’o keixa bainhira hetan ameasa husi dosente ne’ebe halo Asediu Sexual hasoru sira. Nune’e UNTL kria ona provedoria no akonsellamentu atu fó espasu ba estudante sira hodi hato’o keixa bainhira hetan Asediu Sexual iha Universidade.
Asesora Akademista UNTL, Judite Dias Ximenes hatete, UNTL promove ona kampus seguru tanba inisiativa husi Auditoria hodi fó espasu seguru ba feto sira, atu halo auditoria ba fatin sira tanba sempre hamosu asediu sexual. Nune’e UNTL kria fatin seguru estabelese husi UNTL ne’ebe lidera diretamente husi Magnifiku Reitór no Vise-Reitór ba Asuntu Estudantil hanesan mos Prezidente ba grupu traballu tekniku inisiativa kampus seguru nian.
“Inisiativa kampus seguru ne’e halo ona iha tinan kotuk hodi halo sensebilizasaun ba kampus forma estudante no kliner sira atu asegura, katak kampus UNTL hanesan fatin ne’ebe seguru atu estudante sira bele hato’o keixa kona-ba kazu asediu sexual ka abuxu sexual ne’ebe sira hasoru,”dehan Asesora Akademista UNTL, Judite Dias Ximenes, ba Neon Metin iha nia knaar fatin Kampus Central UNTL, Tersa 01/07.
Nia haktuir, Asediu Sexual hanesan krime ne’ebe ema halo hasoru direitus umanus no krime hasoru umanidade, tanba ne’e UNTL eziste fatin Pro-Reitór ba provedoria no akonsellamentu. Provedoria ne’e atu atende karik akontese kazu ruma iha UNTL tenke mai hato’o hodi haree kazu ne’e nia gravidade to’o iha ne’ebe, sé kazu ne’e tama ona ba krime tenke lori ba parte kompetente.
“Ami halo ona sosializasaun iha kampus hotu-hotu tenke hatene-aan, ba estudante sira hato’o keixa karik dosente ruma halo violasaun abuxu sesual no asediu sexual. Profesores sira mos tenke hatene-aan, tanba informasaun sira ne’e ami fahe ona, mak kontinua akontese tan entaun tenke simu nia konsekuensia,”nia esplika.
Estudante labele tauk hato’o keixa bainhira dosente ruma halo asediu sexual hasoru estudante tanba evidensia mak estudante na’in-rasik, karik estudante hetan amiasa husi dosente katak sei la ezame ka la hetan notas di’ak tenke hato’o keixa. Signifika dosente refere halo kazu dala-rua ona, Ida nia halo asediu sexual hasoru estudante no ida nia amiasa estudante hodi la fó ezame ka la fó notas, atu nune’e estudante labele sai vitima beik-beik ba asediu sexual.
