Reportajen David da Costa
Prezidente Republika (PR),Dr. José Ramos-Horta, husu ba Komandante Jerál Polísia Nasionál Timor-Leste (PNTL), atu reforsa seguransa iha fronteira, no nafatin hala’o kna’ar Polísia nian ho di’ak, no hatudu profesionalizmu Polísia nian nafatin.
Komadante Jerál Polísia Nasionál Timor-Leste (PNTL), komisáriu Henrique da Costa, hateten, ohin Komandante Jerál PNTL hetan konvite husi Prezidente Repúblika atu bele mai enkontru ho Xefe Estadu, no iha enkontru ne’e informa kona-ba situasaun seguransa iha rai laran ninian, no mós progressu servisu polísia ninian Ba xefe estadu.
“Xefe Estadu husu PNTL reforsa ita nia seguransa iha fronteira, Xefe Estadu mós husu PNTL nafatin hala’o ninia kna’ar ho di’ak, no hatudu profesionalizmu polísia ninian,” dehan Komadante Jerál Polísia Nasionál Timor-Leste (PNTL), Komisáriu Henrique da Costa, iha Palásiu Prezidente Bairo-Pite, kuarta 2/08.
Maske polísia infrenta difikuldade lubuk ida, hanesan rekursu umanu, transporte, komunikasaun maibé polísia nafatin hala’o nia kna’ar ho rekursu ne’ebé maka iha.
“Situasaun rai laran, ita hotu-hotu akompaña daudauk situasaun normál, ita nia polísia tantu iha munisípiu no mós iha komunidade sira hala’o servisu ho maka’as, espesialmente iha Dili laran,” nia esplika
Maibé dala ruma engarafamentu maka’as iha Dili laran, mas husu ona ba polísia liu-liu sira parte tranzitu nomós parte patrollu sira nune’e fatin balun sira prejensa antes nune’e bele prevene mosu engarafamentu sira ne’e.
Alende ne’e mós, ba Fasilidade polísia sira iha fronteira ida ne’e mós sai difikuldade, tanba menus transporte no rekursu umanu nian ne’ebé maka koloka ba iha fronteira, ida ne’e mós ohin informa ba iha Xefe Estadu.
“Ita nia ema limita, distánsia postu ne’ebé dook, dala ruma ema sira kontra bandu ne’e tama, sai, dala ruma sira liu husi fatin ne’ebé polísia la kobre, no dala ruma tama to’o fali iha klaran mak ita nia patrollu sira seluk konsege deteta. Maibé ita nafatin ho meius ne’ebé ita iha ne’e, ita iha esforsu nune’e fó nafatin kualidade atendimentu ne’ebé di’ak,” nia informa.
Nune’e mós, Prezidente Repúblika José Ramos-Horta husu ba PNTL nafatin servisu ho profesionál, mezmu ho limitasaun ne’ebé iha, maibé polísia labele lakon ninia vontade servisu ho limitasaun ne’ebé iha hatudu nafatin katak polísia prontu nafatin atu asegura duni nasaun no rai ida ne’e.
