Home Notisia Moras Fahi Nian Aumenta, Demetrio Husu Labele Husik Fahi Arbiru

Moras Fahi Nian Aumenta, Demetrio Husu Labele Husik Fahi Arbiru

193
0
Demetrio Amaral de Carvalho, Sekretariu Estadu Meioambiente (Foto: Santina L. da Costa)

Reportajen Santina Lucia da Costa

Relasiona ho moras African Swine Fever (ASF) ka Flu Fahi, diskonfia mai husi Afrika ne’ebe durante fulan hirak liuba hamate ona komunidade nia fahi iha Kapital Dili, mais ou menus  kuaze 400 resin, Sekretario Estadu Meiu Ambiente, Demetrio de Carvalho do Amaral hateten iha Dekretu Lei Hijeniu Publiku ne’ebe bandu komunidade labele husik arbiru fahi iha sidade laran.

“Iha Dekretu Lei Hijeniu Publiku deskreve kona-ba bandu komunidade labele husik animal iha sidade laran, no halo jestaun ba animal sira ne’e. Moras African Swine Fever (ASF), ka Flu Fahi nian, diskonfia mai husi afrika, ne’e tanba ema husik animal sira ne’e iha sidade laran fahi moris ne’ebe la saudavel, bele perigu ba ema nia saude bainhira ema han naan fahi mate, “hateten Sekretario Estadu Meiu Ambiente Demetrio de Carvalho do Amaral, tersa-feira, 08/10/2019,  fatin Hotel Timor bainhira halo seminario kona-ba Jornalizmu Salva Ambiente.

Tanba ne’e Demetrio husu ba ema ne’ebe moris iha sidade laran hakiak animal karik organiza nia fatin.

“Sidade dili ne’e ema mai atu buka moris, laos hakiak animal depois lahatene organiza nia fatin, bou animal sira iha sidade laran,’’ Sujere Sekretario Estadu Meiu Ambiente.

Nia esplika, husik animal arbiru iha sidade laran bele fo impaktu ba ema nia vida no bainhira moras kona fahi, fahi mate ema konsumu arbiru ne’e fo impaktu ba ema nia saude.

“Animál ne’ebé husik arbiru iha sidade laran, moris ho kondisaun ne’ebé la favoravel, entaun moras kona fahi arbiru. Depois fó mos perigu ba ema nia saúde tanba konsume na’an fahi ne’ebé hetan moras,” esplika Demetrio.

Tuir informasaun mak Ministeriu Agrikultura publika ona, notísia online Reuters (30/09/2019)  hatete katak, Ministeriu informa iha fahi 405 mak mate ona iha Dili laran. Agora dadaun governu bandu lori fahi hosi Dili ba munisípiu sira seluk nudar esforsu ida atu tahan epidemia moras fahi nian ne’e.

Ministeriu Agrikultura mos hatete katak Timor-Leste iha fahi 400,000 no bainhira moras fahi nian hadaet makas bele fo impaktu bo’ot ba pursentu 70% hosi familia sira mak hetan rendimentu hosi atividade ekonomia hakiak no faan fahi ka nan fahi.

Oras ne’e dadaun Timor-Leste ho Australia servisu hamutuk hela hodi halo investigasaun hodi buka hatene kauza no fontes hosi moras fahi nian ne’e.

LEAVE A REPLY

Please enter your comment!
Please enter your name here