Reportajen Umbelina dos Reis
“Ha’u Kontente no agradese tebes, tanba parte relevante sira rona duni ha’u lian, no halerik ne’ebé liu hosi média sosial, sira fo duni saída mak ha’u presija hodi tulun ha’u la’o ba mai mak kursi roda, ha’u só bele dehan obrigado barak ba imi nia kolaborasaun ne’ebé tulun ona ha’u,” Maria
Difisiensia fíziku Maria José (14) ne’ebé hela iha Kintal Boot, Santa Cruz, hetan ona apoiu kadeira roda ida horseik (14/11) hosi Pe. Evaristo Fernandes da Costa Soares ho ekipa hosi família boot Jesus Divina Misericordia.
Hafoin publikasaun media Neon Metin ba notísia konabá difisiente Maria José ho títulu “Difisiente Maria José, Hakarak ba Eskola Maibé la iha Kadeira Roda Atu Fasilita nia” (13/11/2022), inklui pajina Facebook seluk ne’ebé fahe informasaun konabá difisiente Maria José ni-nia dezeju atu hetan kadeira roda iha loron rua liu ba, ikus mai hetan duni resposta ba nia hakarak ne’e.
Hafoin fo tiha ajuda, ba Neon Metin Pe. Evaresto haktuir, nia ekipa hosi Jesus Devina Misericordia hetan informasaun hosi média sosial katak alin Maria presiza tulun kadeira roda ida, ho ida ne’e mak sira tulun doreita kedas alin Maria ho kbiit ne’ebé sira iha.
“Liu husi devosaun Devina Misericordia nia obra katak, tau matan ba ema kbiit laek no nesesitariu ba sira ne’ebé presija ami tulun ho kondisaun ne’ebé mak ami iha, alein de ne’e mos ami tulun ema no halo buat barak los ona, fo hahan ba sira ne’ebé mak presija hanesan nesesidade báziku,” dehan Pe. Evaristo.
Pe. Evaristo hatutan, alein de ajuda alin difisiente Maria, sira mos ajuda nesesidade báziku ba kbiit laek sira ne’ebé kuran tebes iha Baucau, Tirilolo. Padre ne’e dehan, dala barak ema tau informasaun iha média sosial atu husu tulun, sira prontu tulun tuir sira nia forsa no kbiit ne’ebé iha.
“Horseik loraik ha’u ho ekipa ba vizita hodi tulun alin Defisiensia Maria José, lori kadeira roda oan ida hodi tulun nia, tanba tuir informasaun ne’ebé ami hetan katak nia presija los mak kadeira roda hodi tulun nia hodi la’o ba mai, nunee ami entrega duni saída mak nia presija,” dehan Pe. Evaristo ba Neon Metin.
Iha Parte sorin ho ajuda ne’e, alin difisiente Maria José sente kontente no agradese tebes tanba nia bele hetan kadeira roda husi Pe. Evaristo Fernades ho ekipa.
“Ha’u Kontente no agradese tebes, tanba parte relevante sira rona duni ha’u lian, no halerik ne’ebé liu hosi média sosial, sira fo duni saída mak ha’u presija, hodi tulun ha’u la’o ba mai mak kursi roda, ha’u só bele dehan obrigado barak ba imi nia kolaborasaun ne’ebé tulun ona ha’u,” Dehan Maria
Iha parte sorin, difisiente Maria José nia inan, Maria Bareto informa, Pe. Evaristo mai ho nia ekipa lori ajuda adeira roda ida ba nia oan Maria José, segunda (14/11), tuku 06:00.
“Sira telefone ha’u ba hein sira iha Semitériu Santa Cruz hodi hasoru sira hafoin mai Uma. Sira lori dos boot ida mai uma depois loke dos iha aan Maria José nia oin, oan Maria José hare hetan kadeira roda ne’e sente kontente no haksolok tebes,” Maria Bareto
Nu’udar inan, Maria Bareto agradese ba Aman Maromak tanba bele rona sira nia lian. Nia mos fo obrigadu ba ema sira iha media sosial ne’ebé ajuda fahe tutan nia ona nia dejezu, ikus mai hetan duni nia hakarak.
“Ha’u só bele dehan ba públiku katak Pe. Evaristo no maluk sira ne’ebé mak tulun ona oan Maria José ho kadeira roda ne’e, ha’u la iha buat ida atu selu, maibé só bele dehan Maromak mak bele selu karidade ne’ebé tulun ona oan Maria José. nu’udar inan sente kontente no agradese wa’in,” espresa Maria José nian Inan ho laran haksolok.
Simu tiha kadeira roda ne’e, Maria José tuur kedas iha kadeira roda ne’e hodi haruka nia main dudu hodi hale’u Bairu Kintal Boot. Padre Evaristo mos husu sira atu Domingo ba misa hodi husu agradese.
