Reportajen Umbelina dos Reis
Inan hosi Maria José ne’ebe ho defisiente ain, Maria Barreto agradese ba media Neon Metin ne’ebé halo publikasaun ba nia oan nia kondisaun defisiente no nia dezeju atu hetan kadeira roda, ikus mai Asosiasaun Defisiénsia Timor-Leste (ADTL) hola kedas medida hodi lori defisiente Maria José ba Centro Nacional de Rehabilitação (CNR) hodi hetan apoiu kadeira roda.
Hafoin Neon Metin publika notísia ho títulu “Defisiente Maria José, Hakarak ba Eskola Maibé la iha Kadeira Roda Atu Fasilita nia” (13/11), hetan kedas reajen hosi sidadaun sira iha Facebook no Asosiasaun Difisiénsia balu ne’ebé foti kedas medida ba kondisaun alin difisiente refere.
“Ha’u sente kontente tanba liu hosi Media Sosial (Publikasaun Neon Metin), ADTL bele tau matan ba ami nia oan nia kondisaun hodi ba aprezenta iha CNR hodi bele sukat nia Kadeira roda. Hosi CNR hateten mai ha’u katak ami nia oan Maria Jose sei hetan kadeira roda iha tempu badak, ami hein kontaktu de’it,” dehan Maria José nian inan ba Neon Metin tersa-feira, 14/11.
Iha parte sorin, Neon Metin ko’alia ho Auria da Piedade Pinto, Xefe Departamentu Fisioterapia konabá apoiu kadeira roda, nia informa alin defisiente Maria José, hanesan pasiente tuan desde tinan 2012, ne’ebé sempre halo terapia iha momentu ne’ebá, maibé la hatene tanba kondisaun família mak nia la ba to’o ohin loron, no nia hakat fila-fali mai CNR hodi sukat nia kadeira roda.
“Horseik (14/11) nia mai ami fila-fali, ami nia tékniku sira sukat ona nia medida kadeira roda maibé sei iha prosesu nia laran, nia membru CNR tuan la’os foun,” informa Auria.
Xefe Departamentu ne’e hatete, prosedimentu atu hetan kadeira roda ne’e la’os prontu kadeira kedas atu entrega, maibé sei sukat tuir nia medida isin no kondisaun, hafoin tékniku monta tuir nia nia tipu no kondisaun, no presiza semana ida ka rua hafoin kadeira ne’e prontu.
“Tanba tékniku sira atende kadeira roda ne’e ba ema ho defisiénsia Timor laran tomak, nune’e mos aban bairua karik entrega kadeira roda ne’e la’os iha uma de’it maibé lori ema defisiénsia ne’e mai CNR mak ami hafoin entrega nune’e buat balun laloos karik hadi’a kedas hafoin entrega kadeira roda nee ba ema ho defisiénsia ne’e mak nia bele uza iha uma,” nia dehan.
Nia mos husu informasaun konabá pasiente tuan Maria José nia terapia durante ne’e oinsá, hosi parte família informa katak tanba ho servisu barak nune’e sira labele lori difisiente Maria José atu terapia loro-loron. Xefe ne’e hato’o katak, iha ona kadeira roda bele halo terapia loro-loron, maibé tanba idade defisiente Maria José 14 ona, nune’e presiza terapia hodi preve ba kondisaun ida grave liu.
