Reportajen David da Costa
Banku Dezenvolvimentu Aziátiku (ADB) sei kontinua fó apoiu ba Timor-Leste hodi promove kreximentu inkluzivu no hametin reziliénsia, liu husi hadi’ak implementasaun projetu sira no habelar oportunidade dezenvolvimentu ba povu iha nasaun tomak.
Diretór Jerál Banku Dezenvolvimentu Aziátiku (ADB) nian ba Sudeste Aziátiku, Nianshan Zhang, hatete, Inaugurasaun Misaun Rezidente ADB ne’ebe renova iha Dili reprezenta kompromisu foun atu hametin parseria, hadi’a projetu sira, no habelar oportunidade sira nian ne’ebe sei fó benefísiu ba komunidade sira iha nasaun tomak.
Tanba ne’e ADB mos apresia lideransa Governu Timor-Leste no orgullu atu sai parseiru ho Governu Timor hodi promove kreximentu inkluzivu, reziliénsia, no futuru povu Timor-Leste nian.
“Ami hato’o ami nia apresiasaun kle’an ba Governu Timor-Leste ba nia lideransa no vizaun. Ita boot nia dedikasaun atu avansa kreximentu inkluzivu, harii reziliénsia, no investe iha futuru, ita boot nia povu nian inspira ami hotu. Ami orgullu atu hamriik hamutuk ho ita boot sira nu’udar parseiru iha serbisu importante ida ne’e,”dehan Diretór Jerál ADB nian ba Sudeste Aziátiku, Nianshan Zhang, iha nia diskursu iha edifísiu ADB Faról, Tersa 21/04.
Tanba ne’e, ADB mos rekoñese kontribuisaun sira ne’ebe labele sura hosi ADB nia parseiru dezenvolvimentu sira, ne’ebe nia kooperasaun garante katak projetu sira fó impaktu loloos iha terrenu.
“Permite ha’u atu rekoñese RMS, ekipa projetu nian, no parseiru sira seluk ne’ebe nia profisionalizmu no dedikasaun halo renovasaun ida ne’e sai posivel. Sira nia serbisu fornese ona mai ami ho espasu ida ne’ebe modernu, funsionál, no akollidu ne’ebe sei sai hanesan sentru ba diálogu, koordenasaun, no inovasaun,” nia dehan.
Nia haktuir, Banku Dezenvolvimentu Aziátiku servisu hamutuk ho Timor-Leste dezde ninia independénsia, fó apoiu ba investimentu sira iha infraestrutura, edukasaun, saúde, no dezenvolvimentu setór privadu.
“Ami nia misaun iha ne’e sempre atu ajuda harii fundasaun sira ba kreximentu sustentável, reziliénsia, no prosperidade. Ho Misaun Rezidente ne’ebe hadi’a ona ne’e, ami ekipadu di’ak liután atu kontinua serbisu ne’ebá no atu serbí nu’udar parseiru forte ba Governu no povu Timor-Leste,” nia subliña.
Nia Salienta, bainhira haree ba oin, ADB nafatin kompromisu atu servisu besik ho Governu no ADB nia parseiru sira hodi hadi’a dezempeñu projetu nian, hametin pipeline projetu nian, no garante katak inisiativa ida-idak kontribui ho signifikativu ba povu Timoroan nia moris.
“Ohin marka kapítulu foun ida. Mai ita selebra marku ida ne’e hamutuk no husik ida ne’e fó hanoin mai ita kona-ba kbi’it parseria nian, vizaun ne’ebe fahe, no asaun koletiva,” nia afirma.
Iha fatin hanesan, Prezidente Republika (PR) José Ramos-Horta, hateten, Banku Dezenvolvimentu Aziátiku (ADB) mak banku ida ne’ebe ho matenek, kakutak, no komitmentu atu ajuda dezenvolvimentu iha Timor-Leste liu husi infraestrutura no apoiu ba governu, la’os hanesan banku komersiál sira seluk.
“Ha’u kontente ho ADB nia servisu iha Timor-Leste, ADB banku ida, sira la’os instituisaun ONG ka institusaun solidaridade banku, maibe banku ida ho matenek ho kakutak ho fuan ho komitmentu,” dehan Ramos-Horta.
Tanba ne’e dala barak, buat sira ne’ebe ADB halo ne’e liu husi garantia, infraestrutura, balun empretismu ba governu, maibé empretismu ba governu funan ne’e kaman loos, la’os hanesan ho banku sira seluk, komersial ne’e.
“Obra ne’ebe sira halo sempre iha kualidade, desde ukuk kedas ha’u haree, buat ne’ebe ABD maka kaer sai kualidade, estrada, ponte, ne’e deuni ha’u kontente teb-tebes ho ADB nia servisu. Sira mos kontente, sira hatete rezultadu diak iha Timor, sira kontinua,” nia konklui.
