Home EduTek Kongresu ICT-TL, Konsolida Rekursu Hodi Konkretiza Papel TI no Komunikasaun

Kongresu ICT-TL, Konsolida Rekursu Hodi Konkretiza Papel TI no Komunikasaun

622
0
Kongresu ICT-TL iha IOB. [Foto: Adroaldo | 05.11.2020]

Reportazen Adroaldo ‘Saretukau’

Asosiasaun ICT – TL realiza kongresu Asosiasaun ICT – TL daruak no semináriu nasional ho tema “Konsolida Rekursu Hodi Konkretiza Papel Teknolojia Informasaun (TI) no Komunikasaun iha Dezenvolvimentu Nasional”, iha salaun Instituto of Business (IOB).

Liu hosi seminariu refere Koordenador Komisaun Organizadora, Natalio Raimundo Soares hateten, Asosiasaun ICT – TL ne’ebé mak estabelese iha tinan 2007, depois halo nia primeiru kongresu iha Novembru 2007, tuir estatuta organizasaun ni-nian, mandatu ba estrutura mak loloos tinan haat dala ida.

Nia dehan loloos tinan haat liu ba akontese ona kongresu, maibé tanba iha difikuldade oi-oin, entaun la konsege realiza, lori tinan 12 mak konsege organizasaun ne’e halo fali nia kongresu dala rua.

“Hanesan organizasaun sempre mosu susesu iha lideransa, lolos hosi períodu ida ba períodu seluk tenki mosu figura seluk, hodi lidera organizasaun ida ne’e. Tan ne’e mak iha tinan ida ne’e oportunidade di’ak ba Asosiasaun ICT – TL, atu bele realiza nia kongresu ida ne’e”, hateten Prezidente Komisaun Organizadora ICT – TL iha Salaun IOB Fomentu, 05/11

Nia hateten iha programa lubuk ida ne’ebé halo, hodi hakat to’o ba iha kongresu ida ne’e, iha seminariu, atividade seluk hanesan Bazar Digital ka Feira ICT, iha kompetisaun Blog no mos kompetisaun ba Game Online sira.

Nia hatutan objetivu hosi semináriu ida ne’e atu bolu entidade sira hodi fo hanoin no fahe hamutuk konabá área ICT nian.

Iha fatin hanesan partisipante estudante UNTL, Ercilia Amaral, ne’ebe tuir kompetisaun Blog ne’ebé organiza hosi Asosiasaun ICT – TL, hateten sira partisipa iha kompetisaun Blog Computer hamutuk ho nia belun sira konabá promosaun fatin turizmu iha Timor no Munisípiu sira liu hosi Blog.

“Kompetisaun ne’ebé ami kompete mak Blog, ida ne’e oinsá atu hatene fatin turizmu sira iha Timor. Ami hosi UNTL mai iha ne’e lori Munisípiu Manufahi nia naran, atu deskobre no hatene di’ak liu tan fatin turizmu sira ne’ebé mak iha Munisípiu Manufahi. Ema hosi estranjeriu ne’ebé mai, seidauk hatene karik, liu hosi Blog ida ne’e ema bele hatene no bele ba iha fatin ne’ebá”, hateten Ercilia ba Neon Metin

Nia hatutan nu’udar ema timoroan kontente no orgullu tebes atu fahe sistema Blog ida ne’e, atu nune’e ema bele hatene katak iha Munisípiu sira mos iha fatin turizmu no atrai ema hodi visita.

Iha parte sorin kongresista Estudante IOB, Mateus da Costa de Araújo sente orgullu partisipa iha eventu ne’e, tanba bele aprende hodi kapasita nia aan ba futuru.

“Ita aprende de’it iha eskola la to’o, maibé oinsá kapasita ita nia aan iha área espesífiku IT ni-nian hosi ita nia senior sira ne’ebé mak iha esperiénsia barak no koñesimenru di’ak konabá área IT, atu nune’e sira bele partilla no fo sai siénsia ne’ebé mak sira aprende uluk tiha ona ba ita, oinsá atu kapasita fali ita nia aan iha área ICT ni-nian, atu iha future mai ita bele dezenvolve aan ho di’ak”, hateten Mateus

Partisipante sira ne’ebé partisipa iha eventu refere, mak Profisional IT Timor Oan ne’ebé mak asumi nin-nia knaar iha Intituisaun Estadu, iha Seitor Privadu, iha mos kuota ba Estudante na’in lima kada Universidade ne’ebé mak iha ni-nia Departamentu Informátika.

Semináriu no kongresu ne’e hetan apoiu no kolaborasaun hamutuk ho entidade Telkomsel, Telemor, TT, investor Metro Link, Genesis Tech, Timor Plaza, Euros Group, Fundasaun Dezenvolvimentu Software Livre no mos komunidade Online sira inklui média Crocodilo Multimédia ne’ebé halo Live Streaming  ba eventu no IOB.

Print Friendly, PDF & Email

LEAVE A REPLY

Please enter your comment!
Please enter your name here