Reportajen Filomena da Conceição
Alumi Parlamentu Foinsa’e Timor-Leste (APFTL), hamutuk ho ChildFund Timor-Leste, hodi hala’o lansamentu ba Projetu Swipe Safe seguransa online nu’udar abordajen sistematiku hodi halo Internet Seguru Ba Labarik Sira, iha Eskola Teknika Informátika ETI-Dili.
Alumi Parlamentu Foinsa’e Timor-Leste (APFTL), Imanuel Soares, nu’udar kordenadór ba Projetu Swipe Safe, hateten, APFTL hanesan organizasaun ida ne’ebé sai mahon ba Foinsa’e sira ne’ebé mai hodi halibur nia idea sira hodi kontribui ba dezenvolvimentu rai ida ne’e nian.
” Iha Projetu Swipe Safe, APFTL hetan fiar husi ChildFund Timor-Leste hodi sai hanesan orgaun implementadór ida ba projetu Swipe Safe nian” dehan Kordenadór projeitu Swipe Safe, Manuel ba Jornalista sira iha Eskola ETi-Dili, kuarta 23/08.
Nia esplika, ohin loron ema hotu moris iha era-teknólogia ne’ebé mais avansadu tanba ne’e ba ema barak mak hetan risku online iha Kualker tempu, ho ida ne’e mak Swipe Safe hanesan projetu inovadór ida atu bele halo profisaun iha risku online.
Iha fatin hanesan, Country Diretór ChildFund, Irine Pijkstra, haktuir, joven barak iha Timor-Leste mak uza Internet hodi lansa informasaun no foti informasaun nune’e iha risku balun ba labarik sira iha Timor-Leste relasiona ho abuzu Online.
Tanba ne’e, husi programa Swipe Safe atu bele kapasita labarik no Foin-sa’e sira hodi aproveita oportunidade ne’ebé mundu digitál oferese no fó ba sira koñesimentu no abilidade atu bele identifika risku no proteje an husi abuzu Online.
“ChildFund Timor-Leste hala’o ninia projetu ida hanaran Swipe Safe (pasa Seguru) nu’udar programa inovadór seguransa online ida ne’ebé destina atu aumenta ambiente protesaun ba labarik no joven sira tantu meu online ka offline,” Dehan Irine.
Nia salienta, projetu refere sei hala’o durante tinan tolu, hahú iha 01/07/22 to’o iha 30/06/2025 no kobre Munisípiu rua mak hanesan: Díli no Lautém iha eskola Pre-Sekundaria no sekundaria sira no grupu relijiozu sira, negósiu, polísia, no governu sira liuhusi Ministériu relevante hodi promove seguransa Online.
Entretantu, Diretór eskola Teknika Informátika ETI-Dili, António Moniz, hateten, projetu ne’e husi ChildFund no APFTL sira hodi realiza ih eskola ETI-Dili, atu hanorin estudante sira hodi bele uza teknolojia ho di’ak no seguru tanba teknolójia ohin loron labarik barak mak uza sala no sai vitima ba teknolójia.
“Ha’u hanoin projetu ida ne’e bele hafasil estudante sira hodi komprende di’ak atu uza teknolójia ho di’ak, maske projetu ida ne’e ses oituan husi atividade eskola nian maibé ida ne’e hanesan programa adisional ida hodi bele fasilita estudante sira tanba ne’e sente orgullu tanba bele hili ona ami nia eskola ida ne’e,” tenik nia.
Entertantu Projetu ida ne’e hetan fundu husi governu Austrália, no tuir tarjeitu sei fornese treinamentu ba estudante sira iha nivel sekundaria hamutuk 5.000 no inan Aman hamutuk 1.000. No iha lansamentu ba Projetu refere hetan partisipasaun husi, reprezenta Ministériu Edukasaun, Diretór eskola Teknika Informátika ETI-Dili, membru Alumi Parlamentu Foin-sa’e Timor-Leste (APFTL), Country Diretór ChildFund Timor-Leste no estudante husi eskola Teknika Informátika ETI-Dili.
