Reportazen Bernarda da Costa*
Trabalador timoroan hamutuk 49 sei ba serbisu iha Korea do Súl maibe ho situasaun COVID-19 halo trabalador hirak ne’e sei hein, tamba Timor-Leste seidauk iha aviao rasik no governu Korea hakarak wainhira Aviao ne’ebe atu tula trabalador sira tenke regular.
Sekretario Estadu Formasaun no Impregu (SEFOPE), Alarico de Rosario hateten enkontru ohin entre embaixador Korea do sul ho SEFOPE, hodi deskute problema sira ne’ebe mak ita hasoru, hodi buka meius atu haruka fila fali trabalador sira ba serbisu iha korea do Sul.
“Prosesu ne’ebe mak ita la bele rezolve maka transporte, tamba Korea no Timor -Leste nia hakarak la hanesan. Korea nia hakarak katak aviao ne’ebe atu lori trabalador sira tenke regular signifika katak aviao aluga labele tula trabalador sira, maibe ita hotu hatene katak Timor-Leste seidauk iha Aviao rasik, tamba ne’e mak trabalador sira to’o ohin loron seidauk ba”,dehan Alarico iha SEFOPE-Kaikoli,4/03.
Nia dehan nasaun hamutuk 16 mak serbisu iha Korea do Sul, husi nasaun hirak ne’e, Cambodia mesak maka foin haruka nia trabalador ba serbisu iha Korea, sekarik Timor -Leste iha nia transporte rasik, entaun Timor ho Cambodia deit maka bele ba ona serbisu iha Korea.
“Iha tempu badak ami sei haruka karta ba iha embaixador Korea,no embaisador sei anexu karta ne’e no husu ba governu Korea atu buka dalan hamutuk koalia konaba transporte,” nia sublina
Iha parte Seluk Embaixador Korea do Sul, Kim Jheong-Ho hateten agora dadauk ho situasaun pandemia COVID-19 seidauk bele haruka trabalador sira hodi ba serbisu iha Korea, sente katak joven barak mos frustradu hela ho situasaun ida agora.
“Ohin hau mai hasoru SEFOPE hodi koalia para oinsa buka meius hodi bele rezolve problema ne’ebe mak Timor-Leste hasoru dadauk, ”dehan Embaisador Korea.
Nia haktuir ho situasaun COVID-19 halo governu Korea seidauk bele simu trabalador sira ne’ebe mak kontratu foun, ne’e laos Timor deit maibe iha mos nasaun 15 seluk seidauk bele tama Korea no governu Korea bele simu maka trabalador sira ne’ebe mak tuan.
*(Bernarda da Costa nudar estudante UNTL ne’ebe estajiu iha Neon Metin)
