Reportazen Bernarda da Costa*
“Ami nia familia la haruka osan mai, entaun meius ne’ebe ami uza hodi halo maka empresta vizino no kolega sira nia osan, atu nune’e bele satan netik ami nia nesesidade loron-loron”. Alsina.
Relasiona ho estadu emergensia (EE) iha Munisipiu Covalima, hamosu preokupasaun hosi estudante universitariu sira ne’ebe mak halao hela sira nia estudua iha kapital Dili, tanba afeta ba sira nia nesesidade lor-loron
Neon Metin dadalia ho estudante Humberto Noronha husi Covalima ne’ebe preokupa tebes ho situasaun ne’e tamba familia la bele haruka osan no hahan ba sira, tamba sira nia nesesidade loron-loron depende deit ba inan aman sira iha foho.
“Hau eskola iha Dili hela iha uma aluga (kos) no uma nain ezije ona hau atu selu maibe osan laiha, no dook husi familia tomak, famila hela hotu iha munisipiu Covalima no nesesidade loron-loron tau fiar deit ba familia sira iha Covalima, maibe ho estadu emergensia familia sira atu haruka osan mai ladiak,” dehan Humberto iha Kaikoli, 04/03.
Nia husu ba governu atu hare problema sira ne’ebe mak sira infrenta, hodi buka netik alternativu balun, “ajuda netik ami atu nune’e bele rezolve netik ami nia nesesidade durante iha situasaun EE nia laran”.
Iha parte sorin estudante Alsina Pires Amaral konfesa katak liga ho situasaun EE ne’ebe mak governu hatur maka ami estudante sira husi Covalima ne’ebe hela iha Dili preokupa liu ba osan tanba presiza tebes atu bele ajuda nesesidade loron-loron.
“Ami nia familia la haruka osan mai, entaun meius ne’ebe ami uza hodi halo maka empresta vizino no kolega sira nia osan, atu nune’e bele satan netik ami nia nesesidade loron-loron”, haktuir Alsina.
Nia hatutan osan iha maka sira bele sosa buat hotu tuir presiza loron-loron, tamba sira hela iha Dili aluga ema nia uma(kos)entaun presiza ba nesesidade ne’e barak tebes.
Nia konklui katak governu presiza buka meios hodi hetan solusaun, nune’e la fo impaktu ba sira nia moris iha kapital Dili ne’ebe moris dook hosi familia.
*(Bernarda da Costa nudar estudante UNTL ne’ebe halo estajiu iha Neon Metin)
