Reportazen Francisco JDA
Relasiona ho ezijensia hosi Aliansa Universitariu Timor Leste (AUTL) ne’ebe husu governu kria dekretu lei foun hodi fo mos subsidiu ba timoroan iha rai laran, durante implementasaun estadu emerjensia relasiona ho pandemia COVID-19.
Liu hosi plenaria iha Parlamentu Nasional, bainhia deputadu/a sira halo sesaun diskusaun ho membru governu konaba ezekusaun fundu COVID-19, tuir deputadu hosi bankada Partidu Unidade Dezenvolvimentu Demokrátiku (PUDD), Antonio Benevides deklara relasiona ho subsidiu ba estudante sira iha diskusaun anterior, hatoo ona ba Primeiro Ministru, Taur Matan Ruak atu hare fila fali iha posibilidade ka lae subsidia mos estudante rai laran.
“Ohin ita hotu koalia kona ba rai liur, maibe rai laran ne’e oinsa, ha’u husu ida ne’e laos subsidiu fo kedas ba sira, mais bele ka lae governu hola inisiativa ida, koalia tok ho universidade privada sira, para hare kona ba sira nia propinas iha fulan rua deit, talves ita tama iha situasaun COVID-19 nian liu ba ne’e, subsidiu ba ema hotu, maibe rai laran nian ne’e oinsa bele ka lae fulan rua ne’e governu koalia para reduz”, hatete Deputadu PUDD, Antonio Benevides iha Uma Fukun Parlamentu Nasional, 21/09
Deputadu Antonio Benevides reforsa tan katak kona ba justisa estudante rai laran no rai liur presiza tau as nafatin justica
Hatan ba kestaun ne’e tuir Ministru Asuntu Parlamentares no Komunikasaun (MAPCOMS) Francisco Jeronimo hatete deputadu sira ajuda governu karik bele foti desizaun entermos politika, nune’e governu bele ezekuta no governu fo subsidia ba estudante ba rai liur, tanba sira dok hosi familia, nune’e iha rai liur bele hakmatek atu sira kuidadu sira nia an lalika mai.
“Sira ne’ebe iha ne’e besik familia, sira sente katak seguru iha sira nia situasaun rasik, ida dok hosi familia ne’e laos situasaun ne’e sira osan la iha ne’e lae, problema ida mak familia afeta hosi situasaun ne’e rasik, balun serbisu hanesan agrikultor, balun serbisu hanesan funsionariu, empreza nian no empreza sira mos barak taka, sitausaun sira ne’e hotu fo impaktu boot ba sira iha ne’eba, la hakmatek entaun ida ne’e mak foti dezisaun katak hare uluk lai sira ne’e, atu nune’e bele fo tiha seguransa ba sira depois ita hare iha rai laran”, hateten Francisco Jeronimo.
