Reportazen David da Costa Gusmao
Traballador segurasans husi kompania Guardamor Security nain 42 hamutuk ho Konfiderasaun Sindikatu Timor-Lese (KSTL) halo manifestasaun hasoru kompania Guardamor Security tanba hasai traballador sira sem razaun propiu no la ho responsabilidade.
Porta voz traballador Van Justinho hateten, sira halo manifestasaun ida ne’e tanba, kompaña Guardamor Security hasai sira sem problema no laiha resposanbilidade ba sira.
“Ami mai ezije ami nia diretu ba kompaña ida ne’e, tanba durante tinan barak ami halo kontribuisaun ba kompania ne’e, maibe kompania rasik la interese ami, ikus sira husik ami abandona deit, ami nia diretu ne’e oinsa los mos kompaniaa ne’e la hatene”, informa porta voz iha kompaña Guardamor Fatuhada nia oin, Segunda-Feira 21/09.
Nia dehan kompaña ne’e akumula ema barak no fo serbisu ba Timoroan barak, maibe laiha responsabilidade ba nia traballador sira tuir lei ne’ebe iha.
“Ami hamutuk nain 42 ne’ebe mak kompaniaa Guardamor Security hasai ami iha dia 1 Janeiru 2020 ne’e kedas, ho ida ne’e mak ami hakarak mai ezije kompania nee, atu bele fo solusaun ba problema ida ne’e, seilaiha solusaun ba problema ida ne’e, mak ami sei kontinua halo asaun manefestasaun hasoru kompania ida ne’e”, tenik nia.
Hatan ba prekupasaun traballador sira nian, Assesor Juridiku Kompaña Guardamor Security, João Cabral Soares hateten Banku Nasional Ultramarino (BNU) fo tender ba kompania Guardamor Securty ho kompania sentinel grupu mak tuir tenderizasaun, husi rezultadu tenderizasaun Guardamor lakon no Santinel grupu mak manan nain ba tender ne’e, maibe kompania ne’e lakohi rekruta ema no la troka farda entaun traballador mai ezije fali.
“Bainhira ami simu ona notifikasaun husi sira, ami prontu atu rezolve problema ne’e tuir dalan legal”, nia dehan.
Tuir objervasaun jornalista Neon Metin iha terino katak manefestante sira ne’ebe halo asaun iha portaun kompania Guradamor oin, hetan agregasaun fiziku husi seguransa Guardamor no hetan tuda mos husi ema deskonesido, maibe Polisia Nasioanal Timor-Leste (PNTL) sira to’o iha fatin hodi hakalma fali situasaun ne’e.
