Reportajen Silvino Freitas
Implementasaun programa Sesta-Bazika husi oitavu governo nian, partidu Congresso Nacional Reconstrução de Timor (CNRT) ho komprimisiu sei loke auditória ,hodi hatene implementasaun programa refere, nune’e mós governasaun CNRT sei diskuti kontinuidade no modalidade implementasaun tuir nesesidade povu nian.
Xefe Bankada CNRT iha Parlamentu Nasionál, Duarte Nunes hateten, governasaun CNRT sei loke auditória ba programa sesta-bazika ne’ebé implementasaun husi oitavu governo nian, hodi bele hatene nia benefísiu ba komunidade no orsamentu ne’ebé durante ne’e aloka.
“Auditória ne’e komprimisu partido nian ne’ebé hala’o durante kampaña eleitorál, hodi haree osan ne’ebé aloka ne’e ba duni benefisiáriu ka lae, tanba ami aprova iha ne’e osan ne’e ba duni povu benefisiáriu ka lae” dehan Duarte iha sede bankada CNRT, (31/05).
Nia dehan, governasaun CNRT mós sei hala’o prosesu evaluasaun ba programa sesta-bazika hodi diskuti kontinuidade programa nian bazeia ba nesesidade, tanba ne’e programa governu nian ne’ebé sei lori mai aprova iha parlamentu hodi haree modelu implementasaun.
“Maibé kona-ba auditória ne’e promete ona nune’e governu sei hala’o, inklui parlamentu mós sei hala’o rasik” konklui Xefe Bankada CNRT Duarte Nunes.
