Home Notisia HASATIL ho Koligasaun Agrikultura Lansa Sentru Media Hodi Akompaña Debate OJE 2022

HASATIL ho Koligasaun Agrikultura Lansa Sentru Media Hodi Akompaña Debate OJE 2022

146
0
HASATIL ho Koligasaun Agrikultura halo konferensia imprensa. [Foto: Santy | 25.11.2021]

Reportajen Santina Lucia da Costa

Oxfam hamutuk ho HASATIL no koligasaun Agrikultura Timor-Leste halo Lansamentu ba sentru media ho naran “Hametin Ekonomia ne’ebé Diversifikadu no Inkluzivu iha Orsamentu Jerál Estadu (OJE) 2022” ne’ebé halo iha sede HASATIL, Farol.

Iha Lansamentu ne’e, Porta-Voz koligasaun Agikultura, Herminínia de Jesus Pinto hateten, Rede Koligasaun Agrikultura mak rede ne’ebé envolve agrikultór, grupu ema ho defisiénsia, setór privadu, grupu feto iha agrikultura, organizasaun juventude, LGBTI, grupu kooperativa, movimentu sosiál no grupu sira seluk ne’ebé iha interese, atu dezenvolve setór agrikultura no promove ekonomia diversifikada ne’ebé sustentável no inkluzivu iha Timor-Leste.

Porta-Voz koligasaun Agrikultura, akresenta Rede Koligasaun ida ne’e konkorda hodi harii no estabelese Sentru Mídia iha sekretariadu Rede HASATIL iha Farol, Díli hodi monitoriza, akompaña no halo advokasia ba diskusaun proposta OJE 2022. 

Nia hatutan, Sentru ida ne’e sei fasilita espasu ba ema no organizasaun oi-oin, atu fó sira nia hanoin no akompaña prosesu debate OJE 2022 iha Parlamentu Nasionál.

Rede Koligasaun Agrikultura mós husu ba Parlamentu Nasional no governu atu halo debate ho kle’an, matenek ho kuidadu, hodi konsidera situasaun real ne’ebe agora Timor-Leste hasoru. 

Porta Voz ne’e dehan refere ba proposta OJE tinan 2022 katak, despeza estadu ne’ebé la sustentavél no la realistiku sei fó risku boot ba sustentabilidade rezerva ba fundu Petróliferu no finansa públiku iha futuru, bainhira Timor-Leste laiha ona reseita husi kampu mina no gás ne’ebé  Timor-Leste iha.

“Realidade públiku hatene katak, Fundu Petrolíferu sei hotu iha tempu besik, tamba ne’e governu tenke investe agora seitor agrikultura no seitor produtivu seluk hodi diversifika ekonomia nasionál.” tenik Hermínia iha sede HASATIL, Farol, 25/11.

Nia realsa tan katak, Sentru mídia ne’e sei  funsiona husi inísiu diskusaun proposta OJE tinan 2022 iha fulan Dezembru tinan ne’e, no sei kontinua monitoriza ezekusaun OJE ne’ebé promulga husi Prezidente Repúblika.

No Sentru mídia ne’e sei kontinua realiza konferénsia imprensa, programa Talk Show, diskusaun konjunta no diskusaun nakloke ba jornalista sira, kona ba análize proposta Orsamentu Jerál Estado tinan 2022 no atividade importante seluk tan. 

Iha fatin hanesa, Koordenadór Forum Juventude Defisiénsia Ermera (FJDE), Marcos de Jesus Martins hateten durante ne’e iha atividade kona-ba produsaun kafé ut, mobiliza ema maluk defisiénsia ne’ebé iha area izoladu, oinsá atu bele kria atividade ba sira.

“Ami husu ba governu relasiona ho OJE 2022, governu bele tau mós prioridade ba ema ho defisiénsia, tanba dala barak ema ho defisiénsia ne’e sira dehan labele halo buat ida, maibé realidade defisiénsia balun iha hanoin atu kria atividade ba sira nia-an, tanba ne’e mak ami sujere ba estadu oinsá atu bele tau atensaun ba ema ho defisiénsia sira ne’ebé durante ne’e iha hela atividade iha area izoladu sira.” rekomenda, Koordenadór FJDE, Marcos de Jesus Martins.

Enkuantu membru husi Koligasaun agrikultura HASATIL, Lao Hamutuk, Permatil, Oxfam Timor-Leste, RHTO, ADTL, APFTL, Juventude Agrikultór Munisípiu no seluk tan.

Print Friendly, PDF & Email

LEAVE A REPLY

Please enter your comment!
Please enter your name here