Home Notisia Feira Mie Lokál, Paula: Ita Mesak Joven, Halo Inovasaun Ba Hahán Lokál

Feira Mie Lokál, Paula: Ita Mesak Joven, Halo Inovasaun Ba Hahán Lokál

258
0
Feira Mie Lokal. [Foto: Adro | 25.11.2021]

Reportajen Adroaldo ‘Saretukau’

Agora Food Studio ho Timor Mie kolabora ho Kdadalak Sulimutuk Institute hamutuk ho to’os na’in sira organiza ‘Feira Mie Lokal’ ne’ebé hala’o durante loron rua hosi 23-24, Novembru iha Salaun Parokial Postu Administrativu Maubara.

Ba abertura Feira Mie Lokál, Project Manager feira, Paula Torres hateten sira nu’udar joven produtivu hakarak promove no halo inovasaun liu ba iha produtu lokál.

“Ita mesak joven hotu de’it, ami halo inovasaun ba hahán lokál, hanesan restaurante ida promove liu hahán lokál no mos treinamentu ba joven foinsa’e sira atu aprende inovasaun hahan ne’e ho nutrisaun ne’ebé ke di’ak no mos ba oin hakarak kria fali negósiu ki’ik bele iha oportunidade halo ida ne’e”, hatete Project Manage Feira, Paula, iha Salaun Parokial, Maubara, 23/11.

Nia hatete feira ida ne’e iha kolaborasaun ho grupu lubuk ida ne’ebé sira organiza hodi responde ba Covid-19 durante tinan rua nia laran ne’ebé atividade hotu paradu.

“Programa ne’e halo hodi responde liu ba COVID, katak agora da-dauk ne’e 2020-2021 ne’e COVID, entaun iha programa ida ne’e Agora Food Studio aplika iha Oxfam ne’ebé hosi Australian Humanitarian Partnership nomos Australian Aid sira nia programa, ami aplika hodi hala’o atividade ida ne’e” tenik Paula.

Project Manager Feira ne’e hatete, iha feira ne’e sira konvida autoridade lokál ho entidade relevante sira atu hamutuk no diskute ba aktividade sira to’o iha programa feira ida ne’e rasik hamutuk ho grupu estabelesidu sira.

“Iha grupu restaurante, grupu produsaun nomos grupu marketing nian. Grupu produsaun ne’e sira fokus ba halo supermie lokál de’it, ba te’in ne’e kolega sira hosi grupu restaurant no mos iha marketing, sira mak halai liu ba kolaborasaun entre to’os na’in sira, sira foti hahan sira hosi sira nia to’os grupu rasik, hosi Kaisabe, Hadi’a Moris, Selimu satu, Selimu dua, entaun sira prodús fali, sira rasik mak buka ba fa’an” Nia hatete.

Nia hato’o katak sira nia planu ba oin Mie Timor ne’e atu hatama ba iha merenda eskolar tuir kuantidade produsaun grupu nian, iha parte seluk atu halo mini feira, catering ka tau iha restaurant iha Suku Vatuvou nia laran, tanba ne’e nia husu atu autoridade sira nia tulun liu hosi komunikasaun no ligasaun atu bele tulun grupu no agrikultor ki’ik sira ne’e.

Iha fatin hanesan Administradór Postu Administrativu Maubara, Domingos Alves Correia agradese ba parseiru sira hotu ne’ebé hamutuk hodi fo ona treinamentu ba ni-nia joven sira li-liu iha Suku Vatuvou hodi halo inovasaun foun mie instant Timor.

“Ha’u hakarak fo hanoin nafatin ba grupu juventude sira, ba ita hotu katak, ho program ida hanesan ne’e, ita boot sira la’os ohin de’it hatudu ba ami autoridade, estudante sira, maibé ha’u fiar katak ita boot sira hatudu nafatin ba future, la’os hein de’it osan” hateten Administradór Postu Maubara iha abertura feira Mie Lokál.

Lider postu ne’e husu ba joven sira ne’ebe iha esperiénsia ona labele para bainhira imi la iha ona suporta ruma, maibé nafatin kontinua ho saída mak imi aprende no hatudu nafatin imi nia kreatividade.

Timor Mie hanesan produtu inovativu hosi Timor ne’ebé kria hosi joven timoroan sira, oras ne’e Grupu Timor Mie halo treinamentu ba joven sira hodi halo produsaun ba mie Timor iha sira nia fatin tarjetu. Mie Timor nia matéria prima principal mak lakeru, marungi no mos fehuk ho kor rocho.

Feira ne’e implementa hosi Agora Food Studio ho Timor Mie, ne’ebé hetan suporta hosi Australian Aid, Australian Humanitarian Partnership, OXFAM no Kdadalak Sulimutuk Institute. Iha feira ne’e partisipa hosi autoridade loka Postu Maubara hamutuk ho komunidade sira.

Print Friendly, PDF & Email

LEAVE A REPLY

Please enter your comment!
Please enter your name here