Reportajen David da Costa
Asosiasaun Jornalista Timor Lorosa’e (AJTL) Servisu hamutuk ho Oxfam iha Timor-Leste, hodi organiza Media Tour Ba Jornalista sira hodi promove setór produtivu sria iha Munisípiu Ermera, liuliu ba iha Setór agrikultura, Turízmu, Joven kreativu sira, no feto potensial, program Sesonal Works iha Australia nomós ema ho disifisiénsia no LGBT sira.
Presidente Asosiasaun Jornalista Timor Lorosa’e (AJTL) Zevonia Vieira, hateten ttu informa ba publiku katak ohin loron AJTL servisu hamutuk Oxfam iha Timor-Leste, kontinua halo Media Tour Ba Jornalista sira hodi ba iha Munisípiu Ermera hodi foti istoria joven sira nian ne’ebé mak kontribui liuhusi setór produtivu sira. Setór produtivu sira maka hanesan, Agrikultura, Turízmu, nomós oinsa maka promove joven sira ne’ebé hala’o servisu iha program Sesonal Works iha Australia.
“Tanba ne’e AJTL kontinua fó espasu ba ita nian membru AJTL sira, hodi ba halo kobertura iha area rural sira, ho nune’e bele hetan informasaun sira ne’ebé presiza, estadu ho governu sira haree no tau atensaun,” Dehan Presidente AJTL Zevonia Vieira, liuhusi komferénsia Imprensa iha Edifisiu Oxfam Hudi-laran, Kinta 18/04.
Nune’e mós Reprezentante Country Director Oxfam iha Timor-Leste, Adilson Junior mós hateten, AJTL kontinua iha nian komitmentu hodi servisu hamutuk ho Oxfam iha Timor-Leste, hodi hala’o Media Tour. Oxfam ho AJTL la’os foin halo Media Tour, Media Tour ida ne’e halo iha tinan ida liu ba ona, hodi kontinua halo kobertura ba joven sira ne’ebé kreativu iha Munisípiu sira.
Nia haktuir programa Media Tour ida ne’e hetan finasia husi DFAT, liuhusi projeitu prosivu. Ho Objetivu atu lori Jornalista sira ba iha Munisípiu Ermera, hodi halo kobertura kona-ba joven sira nia kreatividade, liga ho sira nia investimentu iha setór Agrikultura. Alende ne’e, iha mos joven sira ne’ebé maka hetan oprtunidade ba iha programa Sesional Works, halo mos kobertura ba sira nian susesu, no saida maka sira aprende kona-ba iha Programa Sesional Works ne’e rasik no saida maka sira kontribui iha sira nian hela fatin no iha komunidade.
Nia salienta, entaun ida ne’e importante tebes atu kontinua halo investigasaun ne’ebé kelan, no bele informa ba politiku nain sira, liuliu ba governu sira ne’ebé maka foti dezisaun, atu bele haree kona-ba potensia hirak ne’ebé joven sira iha area rural iha munisipiu Ermera. Nomós saida maka Governu nia planu atu kontribui para investe hodi hadia no dezenvolve diak liu tan sira ninia investimentu ne’ebé maka durante ne’e sira halo iha area rural.
“Molok Media Tour ida ne’e ita organiza. ita halo uluk Worshop iha loron rua no lori ema sira husi SEFOPE mai espliak kona-ba informasaun sira ne’ebé maka liga ho empregu esterna, joven hira maka envolve iha empregu ida ne’e. Aliende ne’e ita mos konvida sosedade sivil hanesan La’o Hamutuk atu fahe informasaun sira liga ho orsamentu Jeral estadu nian ne’ebé maka haloka ba iha setór Agrikultura no setor produtivu sira seluk,”nia esplika.
Nia esplika liu tan, informasaun hirak ne’e sai hanesan bukae ida ba kolega Jornalista sira hotu-hotu, molok sira tun ba iha kampu hodi halo kobertura, atu bele haklean liu tan no komfirma saida maka akontese iha Munisípiu Ermera. Iha kobertura ida ne’e Maluk jornalista sira sei ba foti informasaun husi joven sira, grupu feto no inklui ema ho defisiénsia sira, nune’e mos autoridade lokal sira atu bele komfirma mos informasaun sira ne’e maka jornalista sira foti ne’e bele iha balansu. Nune’e mós informasaun hirak ne’e bele tulun mos politiku nain sira, hodi kontinua sira ninia investimentu no prioridade sira iha setór Agrikultura no iha setór sira seluk. hodi bele diversifika ita nia ekonomia iha ita nian nasaun
“Entaun hau hanoin ida ne’e maka objetivu no servisu komperasaun ita halo entre Oxfam ho AJTL, no ita espera katak Media Tour ne’ebé maka sei hala’o iha Ermera loron Tolu ne’e sei la’o ho susesu. No kolega jornalista sira bele hetan informasaun sira ho diak no ita bele kontinua halo advokasia iha nivel Munisípiu nomós nivel nasional,”Tenki nia.
Alende ne’e, husi rezultadu Media Tour ne’e maka AJTL sei produs istoria susesu joven sira nian, inklui Feto potensial no ema ho defisiénsia, Grupu joven kreativu sira seluk. No istoria sususu ida ne’e sei halo ba produsaun ba buletin Media Tour nian. No Media Tour ida ne’e sei halo lansamentu hodi konvida Ministeriu sira ne’ebé relevante atu halo diskusaun kona-ba saida maka jornalista sira hetan iha kampu durante hala’o Media Tour.
Programa Media Tour ne’e hetan apoiu fundus husi DFAT ka Governu Australia, liuhusi projeitu HAKFOUN no kolabora ho Oxfam iha Timor-Leste.
