Home Memoria Rui Maria de Araujo: hosi RENETIL, Neon Metin no Mediku ba FALINTIL

Rui Maria de Araujo: hosi RENETIL, Neon Metin no Mediku ba FALINTIL

1170
0
Rui Mária de Araújo, naran revolusionariu Agil, naran seluk Saga Hali Lelon (Foto: Media Independen)

Luta klandestina nia natureza halo ema barak ne’ebe involve iha luta ba ukun rasik an la hatene malu. Rede ida-idak ho ninia sirklu rasik, hosi sirklu klandestina ida ba sirklu klandestina seluk ema sira mak involve la koinese malu. Funu ba ukun rasik an sai naruk no bele hetan ninia objetivu tanba maneira organiza malu ida hanesan ne’e.

Carlos da Silva “Saky”, nia livro, “Antes sem Título, do que sem Pátria! RENETIL Iha Luta Libertasaun Timor-Lorosa’e” fo sai servisu lubuk mak Rui Maria Araujo halo nudar militante RENETIL. Servisu hirak ne’e halo iha situasaun defisil maibe nia halo ho determinasaun aas.

Rui Mária de Araújo ho naran revolusionariu Agil, naran seluk Saga Hali Lelon, membru juradu RENETIL nian halo servisu ho kuidadu tebes iha iha rede klandestina nia laran. Nia involve iha asaun oioin mak loloos ne’e bele lori perigu ba nia an, maibe nia halo buat hotu ho kuidadu duni. Rui Mária de Araújo involve iha produsaun Buletin Neon Metin (agora dadaun mosu fali ho plataforma online neonmetin.info), lori radio emisora tama mai Timor-Leste no hanorin kona ba utilizasaun radio ba komandante gureleiru sira, halo tratamentu ba FALINTIL sira no mos servisu sira seluk ba ukun rasik an.

Indonesia, iha Soeharto nia ukun, media hotu-hotu tama iha kontrola estadu nian. Ema dehan se ukun nain kontrola media ona nia bele mos kontrola ema nia hanoin no hahalok. Soeharto halo duni ida ne’e no konsege halo opresaun ba nia sidadaun sira no mos ema Timor-Leste rasik atu labele iha hanoin seluk kontra politika Indonesia nian. Maibe aktu Soeharto ne’e la konvense no la halo ema Timor-Leste barak hakruk tuir ka rende, iha sira nia pensamentu no mos iha sira nia hahalok. Joventude estudantil lubuk ida mak hamahan iha RENETIL hamrik iha Indonesia iha nia rai laran hodi kontra opresaun Soeharto nian liu hosi meius pasifiku oioin, inklui luta kontra informasaun propaganda Indonesia nian, liu hosi harii no publika bulletin Neon Metin. Rui Maria Araujo halao papel importante ida iha bulletin ida ne’e nudar Xefe Redasaun ida.

Carlos da Silva “Saky”, nia livro deskreve klaru tebes kona ba bulletin Neon Metin nia existensia, ne’ebe mak nia rasik mos hola parte.

“Atu neutraliza propaganda falsu oioin sira ne’e mak RENETIL hamosu boletin lubuk ida. La’os boletin de’it, maibe to’o revista, jornal no radiu hotu. Primeira Media RENETIL nian mak Neon Metin, ninia primeira edisaun sai iha 1988. Neon Metin signifika esperança ka confiança iha dalen portuges ka harapan iha dalen Indonezia. Iha kontestu luta nian, bele mos signifika fiar-an metin. Ida ne’e nudar primeira boletin klandestina nian nebe sirkula iha Timor-Lorosa’e, nune’e mos iha Indonezia no iha rai-li’ur sira seluk,” Saky haktuir iha nia livro laran.

Iha ona tinan 1989 boletin ida  ho naran Neon Metin mosu, truka hosi naran premeiru Boletim de Informação nian. Saky rasik mak fo naran ba boletin ne’e ho Diresaun RENETIL nia aprovasaun.

Neon Metin hakerek iha dalen portuges, la’os sirkula de’it iha Frenti Klandestina ho Armada iha Timor-Lorosa’e, no iha Indonezia, maibe sirkula mos to’o rai boot sira hanesan Australia, Portugal, Brazil, Angola, Mosambike ho Estadus Unidus Amerika.

Iha Neon Metin Rui Maria Araujo hola papel importante. Saky hatete iha nia livro laran Rui Maria Araujo (Agil ka Saga Hali Lelon) mak truka saudoso Lucas da Costa “Rama Metan” nudar Xefe Redasaun. Responsavel ba Administrasaun Neon Metin nian mak La’Sama,

Saky mos hatete katak,”Iha periudu rezistensia nian, Rui Maria de Araújo  ho Lucas da Costa mak troka malu nudar Xefe Redasaun. Lucas sai Xefe Redasaun iha 1990, depois troka fali ho Rui Maria de Araújo iha 1991, no iha 1994, fila fali ba Lucas da Costa. Redaktor Ezekutivu sira mak F.R. Saky, Agil, Berlaka, Si’ak, Ma-Cluan no Bukar, no Distribuidor sira mak Koneng Lay (rai-li’ur), Laloran (Timor-Lorosa’e) no Teki Liras (Indonezia). Korespondenti sira mak António Tilman (Europa), José Luís Guterres (Afrika), Padre Reinaldo (Estadus Unidus America), Koneng Lay (Azia no Oseania), Laloran (Timor-Lorosa’e), Bere Metan (Java), no Mau Rais (Timor-Lorosa’e).

Boletin ne’e la’os de’it publika iha Denpasar, dala ruma publika mos iha Malang. Iha Malang companheiro eis-seminarista sira, hanesan António da Conceição, José António de Jesus das Neves, Bendito Freitas ho sira seluk tan mak kaer.

Iha Denpasar, Rui Mária de Araújo, João Mário Gama de Sousa, Benjamim Martins no autor mak sempre muda artigu sira hakerek ho liman ka ho makina ba iha formatu boletin nian.

Neon Metin ninia papel la’os de’it buka neutraliza propaganda sira Indonezian nian, maibe mos buka projekta maka’as imajen Komandante Xanana Gusmão ho gerilleiru sira nian ba publiku sira iha rai-laran ho iha tasi-balu. La’os liuhusi fotografia sira de’it, maibe liuhusi mos mensajen ho entrevista sira nebe periodik ne’e halo ba Komandante Xanana Gusmão ho ulun rezistensia seluk nian, hanesan Hodu Ran Kadalak, hodi defende mudansa politika sira nebe Comando Superior da Luta halo hodi hasoru kritika, no opozisaun sira husi grupu Abílio de Araújo nian iha Portugal. Neon Metin la’os de’it publika informasaun, maibe mos hakerek artigu sira nebe halo analize ba situasaun politika, militar, ekonomika, sosial no kultural. Neon Metin hakerek ho portuges, sai hanesan alto-falante ka pengeras suara Frenti Klandestina, Armada no Diplomatika nian tanba iha rubrik ba frenti ida-idak iha kada edisaun. Neon Metin orienta ba komunidadi sira ko’alia portuges nebe halo parte CPLP ho komunidadi internasional.

Tanba artigu sira nebe publika iha Neon Metin halo analize nebe di’ak no kle’an ba funu Timor-Lorosa’e nian, mak iha loron 20 Agostu 1990, Komandante Xanana Gusmão rasik fo rekuinesimentu ba kapasidadi analize, no observasaun nebe militante RENETIL sira halo liuhusi boletin ne’e (DRT 07153.048).

RENETIL no Neon Metin kuinesidu no importante tebes ba guerilleiru sira iha ai-laran.

(Foti hosi livro Carlos da Silva Saky nian, “Antes sem Título, do que sem Pátria! RENETIL Iha Luta Libertasaun Timor-Lorosa’e”)

LEAVE A REPLY

Please enter your comment!
Please enter your name here