Home Memoria Rui Maria de Araujo: hosi RENETIL, Neon Metin no Mediku ba FALINTIL...

Rui Maria de Araujo: hosi RENETIL, Neon Metin no Mediku ba FALINTIL (Parte 2-hotu)

3028
0
Rui Mária de Araújo naran revolusionariu Agil, naran seluk Saga Hali Lelon (Foto: Media Hallo)

Rui Maria de Araújo, eis-Xefe Redasaun Neon Metin, konta tuir nia esperiensia iha 1994, iha nebe Padre Julio Crispim Ximenes Belo, lori nia husi Dili ba Baukau hodi halo tratamento ba Komandante David Alex iha ai-laran.

Tuir Rui Maria de Araujo, iha domingu ida, foin sai husi misa, seidauk troka kamiza, kalsa no sapatu misa nian, Padre Julio bolu nia atu tuir nia ba fatin ida. Nia lahatene sira atu ba nebe tanba Padre Julio dehan de’it ba nia tuir nia no ladehan atu ba nebe. Iha loron ne’e, Rui Maria de Araújo nebe nudar mediku, ninia kaben mos militante RENETIL hotu, lahatene Rui ba nebe no lafila ba uma. Rui ta’uk tebes se nia kaben buka nia, bele halo militar Indonezia sira deskobre sira ba Baukau halo tratamentu ba Komandante David Alex.

Iha tempu neba seidauk iha telemovel hodi nia bele fo hatene ba nia kaben katak sira ba Baukau. Sira toba kalan ida iha ai-laran hamutuk ho Komandante David Alex. Tratamentu halo uma to’os ida iha area Samalari, Baukau, nian. Tuir Rui Maria de Araújo, hetan malu foufoun, nia haree Komandante David Alex nia matan hanesan deskonfia nia no guarda-kosta sira ho kilat AR 15 hatudu ba nia. Maibe bainhira nia aprezenta-an nudar membru RENETIL nomos ema nebe uluk hakerek iha Neon Metin, halo Komandante David Alex admira no muda kedas nia postura, nune’e mos guarda- kosta sira nebe foufoun hatudu sira nia kilat AR 15 ninia tutun ba nia hatun kedas kilat.

“Reasaun Komandante ninian, foufoun, ha’u haree, haree husi nia matan, nia lafiar, lafiar katak, ema ida mai hanesan doutor ne’e, nia bele konfia. I entaun, a primeira coisa que ha’u hateten, ha’u dehan Komandante, eu sou membro da RENETIL. Nia dehan hanesan ne’e: Ah RENETIL! Ah RENETIL! Ita repara katak konfiansa be, konfiansa gerilleiru ninian ba RENETIL ne’e delui tiha kedas ninia deskonfiansa inisial. Depois ha’u dehan tan, eu era um dos que escrevia no Neon Metin. Ah! Eu leio sempre Neon Metin. Entaun prontu, ha’u sente hanesan, hanesan mediku oda-matan nakloke ona para ha’u halo konsulta ona. Ida tan, guarda-kosta nebe hamrik, iha fatin, nia [David Alex] toba hela, guarda-kosta ne’e kuandu ha’u tama, [kilat] AR 15 hatudu hela mai ha’u, AR 15 nebe nia kaer hatudu hela mai ha’u. Mas kuandu ha’u dehan RENETIL nia nakloke, depois ha’u dehan Neon Metin, nia AR 15 ne’e hatun tiha kedas. [Ne’e] so para ilustra de’it importansia RENETIL ho Neon Metin ba Rezistensia Armada. Ne’e ha’u rasik testemunha no ha’u hakarak partilha iha ne’e.”

Rui Maria de Araujo lao halo deit ida ne’e maibe iha situasaun seluk ida ne’ebe defisil tebes tanba difikuldadi sira iha komunikasaun, liu tiha tinan ida foin Comando Superior da Luta, fo orientasaun ba RENETIL relasiona ho vizita DPP nian mai Timor-Leste. Orientasaun ne’e hato’o ba RENETIL iha loron 10 Maiu 1991, orientasaun ida nebe bele dehan hatan ona ba Planu Aurora nian. Orientasaun ne’e fo liu husi Rui Maria de Araújo, bainhira nia lori radio transmisor ida husi Denpasar mai Dili hodi entrega ba Komandante Xanana Gusmão nebe subar hela iha Lahane, iha fatin nebe ikus mai militar Indonezia sira kaer nia iha neba.

Rui Maria de Araujo haktuir iha livro Carlos Saky nian katak, iha dia 9 de Maiu de 1991, ha’u simu orden husi Sekretariu-Jeral La’Sama, atu lori parte ida husi radio ida. Ida ne’e mos tanba ha’u nia asneira rasik, ha’u nia sala rasik mak hetan konfiansa i depois sai dezafiu boot ida. Kuandu sosa tiha radiu ne’e husi Jakarta mai, como hau iha manias que hatene ingles uituan, komesa le manual sira, le manual radiu ninian ne’e, depois komesa kaer radiu ne’e a funcionar, ou hanesan ne’e, ou afinal buat ne’e hanesan ne’e. Depois iha Sesetan, dada tiha antena ne’e, para teste tiha radio ne’e.

Rui Maria de Araujo mos haktuir kona ba konfiansa saudoso La’sama nian ba nia atu lori Radio ne’e hosi Bali ba Dili.

“Afinal o hatene bok buat ne’e”, La’sama hatete ba Rui. Rui dehan lae, buat ne’e… ha’u le husi manual naran saida … Eipa, o estuda medisina mas afinal o hatene buat ne’e ga?, [dehan La’Sama]. So para monta hanesan ne’e Rui dehan nia hatene. Mas Rui lahatene katak, [La’Sama] ninia intensaun atu haruka nia lori buat ne’e. Tanba ne’e mak Rui hateten, ha’u nia estupidez, hakarak hatudu ha’u hatene, entaun dia 9, ou melhor un dias antes, ou um dia antes, nia [La’Sama] hateten hanesan ne’e: O ba Dili, lori radiu ne’e ba Dili. Ba Dili, pois ba hasoru malu ho Terus,.. Terus [ne’e] Constâncio Pinto.

Rui Maria de Araujo konsege lori duni radio nia antenna mai Dili no radio nia isin loloon Timoroan ida be militar indoneziu, Veríssimo Gomes, ami bolu Abissu Gomes, nia uluk iha Surabaya, Nando La’Sama nia primu rasik mak lori.

Iha Saky nia livro laran haktuir mos detallu oinsa Rui Maria Araujo lori radio ba to’o iha Xanana nia subar fatin. Rui haktuir iha livro laran katak, iha 9 de maiu de 1991, ho Constâncio Pinto, Rui Maria Araujo tau Radio iha taxi ida, Constâncio hateten: agora ita lori ba entrega. Ha’u dehan: ok, ita ba entrega iha nebe. Mai de’it [dehan Constâncio]. Taxi ne’e fo volta, fo volta, fo volta iha Dili, ha’u dehan: ita ba entrega iha nebe mak ne’e. Mai de’it [dehan Constâncio]. Fo volta depois sa’e ba Lahane, to’o iha deposito de agua Lahane ne’e, taxi abranda, nia fila direita, ha’u fila ha’u dehan [ba Constâncio]: o lori fali ha’u mai mana Aliança nia uma ga? O mai de’it sa [dehan Constâncio]. Prontu ha’u tama ba, tama ba kumprimenta tiha hotu ferik sira hotu.”

“Agora Constâncio dehan hanesan ne’e: agora tur auguenta lai uituan tanba katuas sei haris. Ha’u dehan: katuas se? Katuas Xanana [dehan Constâncio]. Ha’u dehan: o lori ha’u mai tama los iha buat ida hanesan ne’e ga? Kalma de’it [dehan Constâncio].
Prontu katuas [Xanana] haris hotu tiha, sai mai tuur: entaun Agil, está tudo bem? [dehan Xanana]. Halo nusa mak nia hatene ha’u mai? Constâncio hateten ami fo hatene uluk ona o mai. Prontu: mostra lá como é que funciona isto? [dehan Xanana]. Embora iha Bali, ha’u le manual sira ne’e, mas ita boot sira imajina, psikolojikamente, iha momentu neba, estudante baibain ida, membru RENETIL, hasoru komandante em xefe das FALINTIL, é claro que ha’u tuur nakdedar hanesan ne’e. Oupa, tenha calma! Esteja a vontade! [dehan Xanana]. Ha’u dehan, sim, sim, sim, está bem, está bem. So depois de algum tempo mak foin sente naran saida, konfortavel, depois ha’u esplika, esplika, esplika, esplika buat sira ne’e hotu, radiu sira ne’e hotu como é que funsiona,” Rui konta tuir ninia hasoru malu ho maun bo’ot Xanana ba dala uluk.

Iha livro ne’e nia laran, Saky mos fo sai kona ba detallus konversa mak Rui Maria Araujo, Constâncio Pinto halo ho maun bo’ot Xanana Gusmao.

“Agora interessante mak kuandu hau esplika hotu, esplika hotu radiu ne’e, porque radiu ne’e bele mos halo emisora, la’os de’it transmite 2 way, maibe bele halo mos emisora hotu. Entaun komandante Xanana Gusmão hateten hanesan ne’e: muito bem, estou a ver que tu conheces muito bem como é que isto funciona. Nebe ha’u hanoin fila fali ona, estupido, tanba saida mak hakarak hatene, hakarak le buat ne’e, hakarak hatudu dehan hatene. Nia [Xanana] hateten hanesan ne’e: quando vier a DPP, nós vamos montar este radio no torre de Motael, para mobilizar pessoas, e tu tens que vir para tomar conta disto. Ha’u nia laran, ha’u dehan hanesan ne’e: Eipa, em que sarilo que eu me meti pa. Foufoun ha’u le manual ne’e é so por curiosidade, monta radiu, prontu La’Sama haruka ha’u lori mai. Agora ha’u lori mai fo ba comandante em chefe, comandante em chefe hateten hanesan ne’e: kuandu DPP mai, o mai toma konta radiu ne’e hodi halo emisaun,” Rui haktuir iha ninia intervista ho Saky.

Alein de halo servisu sira mak temi ona, iha 1997, Rui Mária mos fo tratamentu ba Komandante Tara. Tara moras no lori mai iha Seminariu Menor iha Balide mak Rui Mária fo tratamentu ba nia. Adjuntu sira barak mos hetan moras, estafeta sira lori mai to’o iha Klinik Motael, fatin nebe Rui Mária serbisu ba hodi simu tratamentu.

Iha biban nebe Komandante Konis Santana moras todan. Iha tinan 1997, Rui Mária Araujo hanoin atu ba Mertutu hodi fo tratamentu ba Komandante gerilleiru ne’e iha ninia subar fatin, maibe tanba situasaun ladi’ak, ne’eduni lato’o ba. Tanba labele ba, ne’eduni nia husu Komandante Konis Santana haruka de’it ninia urina mai iha Dili hodi nia halo analize depois mak sosa ai-moruk haruka ba Mertutu. Molok Komandante Konis Santana mate, iha tinan 1998, Dr. Rui Mária mos fo ona tratamentu medik, dala barak, husi dook ba Xefi CEL/FA nian ne’e. (hotu)

(Foti hosi livro Carlos da Silva Saky, “Antes sem Título, do que sem Pátria! RENETIL Iha Luta Libertasaun Timor-Lorosa’e”)

LEAVE A REPLY

Please enter your comment!
Please enter your name here